لە ڕووداوێکی سەیردا حکومەتی چین لە پارێزگای گینگشی ڕێگایەکی بە شێوەیەکی سەیر بە دەوری خانوویەکدا قیرتاو کرد، ئەمەش دوای ئەوەی ماڵێک لەسەر ماستەر پلانی ڕێگاکەبوو، و خاوەنەکەی ڕەتیکردەوە خانوەکە بفرۆشێت بۆیە حکومەت بەناچاری بە دەوری ماڵەکەدا شەقامە خێراکەی دروستکرد.
بەگوێرەی ئەو وێنە و گرتە ڤیدیۆییانەی بڵاوبوونەتەوە، خانووەکە لە هەردوو لاوە بە ڕێڕەوی ڕێگاوبانەکان دەورە دراوە، بەمەش سەقفی خانووەکە نزیکە لە یەکسانبوون لەگەڵ ڕووی سەرەوەی ڕێگاکەدا.
کاتێک لە سەرەوە سەیر دەکرێت، خانووەکە و دەوروبەری وەک چاوێک دەردەکەون، خانووەکە لە ناوەڕاستی کونێکی بازنەییدایە کە لە هاوێنەی چاوێک دەچێت، ئەمەش وایکردووە ببێتە شوێنێکی سەرنجڕاکێش لە تۆرەکۆمەڵایەتی و سۆشیال میدیاکاندا و گەشتیاری ئەلکترۆنی و بەکارهێنەرانی ئینتەرنێت ناویان ناوە “چاوی گینگشی”.
خاوەنی خانووەکە چەند جارێک ڕەتیکردۆتەوە خانوەکە چۆڵ بکات، چونکە ڕازی نەبوو بەو بڕە پارەیەی کە وەک قەرەبووکردنەوە لەلایەن دەسەڵاتەوە پێشکەشی کرابوو.
پیاوەکە بەردەوامە لە ژیانی خۆی لە ماڵەکەی خۆی لە ناوچەی جینشی لە پارێزگای جیانگشی، لەگەڵ نەوە تەمەن ١١ ساڵانەکەی، کە بە ڕێگای خێرا جی 206 دەورە دراوە.
بۆ ڕووخاندنی خانووەکە کە 160 مەتر چوارگۆشەیە، حکومەت بڕی یەک ملیۆن و 600 هەزار یوان کە دەکاتە 221 هەزار دۆلاری وەک قەرەبوو و دوو زەوی نیشتەجێبوون پێشکەش بە خاوەنەکەی کرد بۆ دووبارە نیشتەجێکردنەوە.
شایەنی باسە نرخی خانووبەرە لەو شارەدا کە نزیکترینە لە ڕێگاکە بە نزیکەی 8 هەزار یوان بۆ هەر مەتر چوارگۆشەیەک مەزەندە دەکرێت کە یەکسانە بە 1100 دۆلار.
دانوستانەکان بۆ ماوەیەکی زۆر بەردەوام بوون و ڕێگای خێرا لە دەوری ماڵەکە دروستکرا و لە کۆتاییدا خانووەکە بوو بە هێمایەکی ناوخۆیی بە ناوی “چاوی گینگشی”.
ئەو پیاوە و نەوەکەی تا ئێستاش لەو ماڵەدا دەژین، بەڕۆژ دەچنە دەرەوە بۆ ئەوەی بەدەوری گوندەکەدا بگەڕێن و دوای تەواوبوونی تیمی بیناسازی ئێواران دەگەڕێنەوە ماڵەوە، بەڵام هیچ بیرۆکەیەکیان نییە کە دوای کردنەوەی ڕێگاکە چۆن لەوێ دەژین.
ئەو پیاوە پەشیمانی خۆی لە سەرسەختی و ڕەتکردنەوەی ئەو مەرجانەی کە حکومەت پێشکەشی کردووە دەربڕی و دەڵێت: ئەگەر بتوانم بگەڕێمەوە دواوە، بە مەرجی ڕووخاندن ڕازی دەبووم ئێستا هەست بە پەشیمانی دەکەم.
