سەرچاوە سیاسییەکان ناوەڕۆکی ئەو پەیامەیان ئاشکرا کرد کە هاکان فیدان وەزیری دەرەوەی تورکیا بە عێراق گەیاندووە.
هاکان فیدان وەزیری دەرەوەی تورکیا ڕۆژی یەکشەممە گەیشتە بەغدای پایتەختی عێراق و لەگەڵ بەرپرسانی عێراقی کۆبۆوە.
وەزیری تورکیا لەگەڵ بەرپرسانی عێراقی مەلەفی ئابووری و ئەمنی و هەرێمییان تاوتوێکرد، دیارترینیان خێراکردنی جێبەجێکردنی پڕۆژەی ڕێگای گەشەپێدان و بەشداریکردنی کۆمپانیا تورکییەکان بوو لەم پڕۆژەیەدا، جگە لە زیادکردنی قەبارەی ئاڵوگۆڕی بازرگانی نێوان هەردوولا”.
میدیا عێراقییەکان بڵاویانکردەوە، فیدان پەیامێکی بە بەرپرسانی عێراق داوە و تیایدا ڕایگەیاندووە، دامەزراندنی دیالۆگێکی بنیاتنەر و پەیوەندییەکی باشی دراوسێی نێوان عێراق و ئیدارەی نوێ لە سووریا لە بەرژەوەندی هەردوو وڵات و هەموو ناوچەکە دەبێت.
هاوکات، جەخت لەسەر پێویستی پاراستنی بەرژەوەندی و سەقامگیری و ئاسایش ناوچەکە بۆ هەردوو وڵات کراوەتەوە.
