مامۆستایانی ناڕازی لە سلێمانی گردوونەوە و لە بەیاننامەیەکدا هۆشدارییان دایە حکومەت و دەڵێن”تا جێبەجێکردنی داواکارییەکانمان بایکۆت بەردەوامە”.
مامۆستایانی ناڕازی، لە کۆنگرەیەکی ڕۆژنامەوانیدا بەیاننامەیەکیان خوێندەوە و تێیدا داواکارییان ڕاستەوخۆ ئاڕاستەی سەرۆکی حکومەتی هەرێم کرد و رایانگەیاند، پێویستە بڕیارەکانی دادگای باڵا لەبارەی تەوتینی مووچەی فەرمانبەرانی هەرێم جێبەجێبکرێت، و ئەو ماف و شایستانەی هەیانە چیتر بەناوی گرفتی مووچەوە نەمێنێت و سەرجەم شایستەکانمان بدەنەوە.
دڵشاد میرانی، نوێنەری مامۆستایانی ناڕازی ڕایگەیاند، مامۆستایانی ناڕازی و گرووپی مانگرتووەکان ڕۆژی سێ شەمە خۆپیشاندانی سەرتاسەری لە سەرجەم شار و شارۆچکەکانی هەرێم ئەنجام دەدەین و داوایان کرد لەسەرجەم شار و شارۆچکەکان بەشداربن و مان لە خواردن و خواردنەوە دەگرن.
ئاماژەی بەوەشدا، ئەوەی مامۆستایان و شەقام کردویانە هیچ هێزێکی ئۆپۆزسیۆنیش نەیاناکردووە، و بە دڵنیاییەوە دەبێت بریارەکانی دادگا جێبەجێبکرێت و تا ئەوکات بایکۆت بەردەوام دەبێت.
ڕاشیگەیاند، حکومەتی هەرێم بە ئەنقەست دەیەویت تەوتین جێبەجێ نەکات، و دەیەوێت مووچە لەژێر دەستی ئەوانبێت، تا وەک کارتی فشار بەکاربهێنێت، ئێمە داوادەکەین چیتر گرفت بۆ مووجە دروستنەکرێت و حکومەتی هەرێم بڕیارەکانی دادگا لە تەوتینی مووچە لە بانکە فیدڕاڵییەکان جێبەجێبکات، بۆئەوەی ماف و شایستە و مووچەکانیان بۆ بگەڕێتەوە.
ئەو نوێنەرەی مامۆستایانی ناڕازی ڕاشیگەیاند، هەفتەی داهاتوو لیژنەیەکمان سەردانی بەغدا دەکات، یاداشتێکمان نووسیوە و سەردانی پارێزگاری بانکی ناوەندی دەکەین بۆ کردنەوەی لقی بانکەکان لە هەرێم.
لەکۆتاییەکانی مانگی یەکی ساڵی 2025 ین و هێشتا مووچەی مانگی 12ـی ساڵی 2024 دابەشنەکراوە و چارەنووسی مووچەی مانگی یەکیش بە نادیاری ماوەتەوە، و مامۆستایان لەدژی نەدانی مووچەکانیان بایکۆتیان کردووە و بڕیاریانداوە تا جێبەجێکردنی داواکانیان بەردەوام بن لە بایکۆت.
