وتەبێژی یەکێتی لەبارەی ڕێککەوتنی یەکێتی و پارتی بۆ پێکهێنانی کابینەی داهاتووی حکومەتی هەرێم زنیاری ئاشکرا کرد و دەڵێت”کاری لیژنەهاوبەشەکان کۆتاییهات ئەوکات شاندی دانوستانکار کۆدەبنەوە”.
سەعدی ئەحمەد پیرە وتەبێژی یەکێتی، لەکۆنگرەیەکی ڕۆژنامەوانیدا ڕایگەیاند، لیژنەی هاوبەشی یەکێتی و پارتی لەکۆبوونەوەکانیان بەردەوامن و گرنگە کێشەکانی ڕابردوو چارەسەر بکرێن، و دوای تەواوکردنی بەرنامەی حکومەت باس لە دیاریکردنی پۆستەکان دەکەین و کەسی شیاو بۆ شوێنی شیاو دادەنێین.
ئاماژەی بەوەشدا، وتیشی، گفتوگۆکانی نێوان یەكێتی و پارتی لەلایەن لیژنەیەکی هاوبەشەوە بەردەوامی هەیە، کە تێیدا باس لەو پرسانە دەکرێت کە پێشتر کێشەیان لەسەر بووە ، هەروەها پێناسەی شێوەی کاری پێکەوەیی و فەرمانڕەوایی لە داهاتوودا دەکەن.
ئەوەشی خستەڕوو، ئێمە لەهەوڵەکانمان بەردەوامین، و ناکرێت هەموو شتەکان بۆ کاتێکی نادیار دوابخەین و گلەیی لە یەکتر بکەین، بۆیە دەبێت سەرەتا کێشەکان دیاریبکەین و باس لە چارەسەریان بکەین، لەم ڕووەشەوە هەنگاوی باش نراوە.
سەبارەی بە دانوستانەکانی نێوان یەکێتی و پارتی، سەعدی پیرە وتی، کە کاری لیژنە هاوبەشەکە تەواو بوو، ئەو کات شاندی دانووستانکاری هەردوو لا کۆدەبنەوە بۆ تاوتوێکردنی ئەو ڕەشنووسەی کە لیژنەکە ئامادەی کردووە، پێشتر کێشەمان هەبووە، ئەگەر ئەو کێشانە چارەسەر نەکەین و ئەوە هەمان کێشە لە داهاتوودا سەرهەڵدەدەنەوە.
ڕاشیگەیاند، لەئێستادا باس لە هیچ پۆستێک نەکراوە، ئەوەی دەوترێت و باس لە دابەشکردنی پۆستەکان پرووپاگەندەیە، ئەگەر لەسەر بەرنامەی حکومەت رێکنەکەوین پۆستمان بۆچییە.
