بە پێی بڕیارەکەی حکومەتی هەرێمی کوردستان، زیاتر لە 600 کارمەندی بەڕێوەبەرایەتی گشتی کارەبای سلێمانی خانەنشین دەبن.
ئەمڕۆ شەممە، ئەنوەر حەمەسەعید، بەڕێوەبەری گشتی کارەبای سلێمانی لەگەڵ بەڕێوەبەرەکانی کۆنترۆڵی کارەبا و گواستنەوە و دابەشکردنی کارەبا و پلان و تەکنیک و کاروباری وزەو کارگێڕی و ژمێریار و یاسا سنووری بەڕێوەبەرایەتی گشتی کارەبای سلێمانی کۆبوەوە.
بە پێی ڕاگەیەدراوێکی بەڕێوەبەرایەتییەکە، لە کۆبوونەوەکەدا “بە وردی گفتوگۆکرا لەسەر هەڵسەنگاندنی کاروبارەکان و پلانی کارکردنی ئەمساڵ و پرۆژەی ڕووناکی و کۆکردنەوەی قەرزی کارەباو زیادکردنی داهات و چارەسەرکردنی کێشەی خانەنشینبوونی فەرمانبەران و چۆنیەتی پڕکردنەوەی میلاکەکانیان”.
ڕوونیشیکردەوە کە بە پێی بڕیاری خانەنشینکردن، 647 فەرمانبەری بەڕێوەبرایەتی گشتی کارەبای سلێمانی خانەنشین دەبن.
پرسی جێبەجێکردنی یاسای خانەنشینی پشیوییەکی لە فەرمانگەکاندا دروست کردووە و ئەگەر هەیە کە کاریگەریی زۆر لەسەر دەوامی خوێندنگە و فەرمانگە و دامەزراوە فەرمییەکان دروست بکات.
