لە چوارچێوەی ڕێککەوتنی نێوان ئیسرائیل و حەماس، چوار ژنە بارمتەکراوی ئیسرائیلی لە لایەن لیواکانی عیزەددین قەسام باڵی سەربازیی حەماس لە كەرتی غەززە ئازاد کران و ڕادەستی خاچی سووری نێودەوڵەتی کران.
ئامادەکارییەکان بۆ ئەنجامدانی گەڕێکی دیکەی ئاڵوگۆڕی دیلەکان لە نێوان ئیسرائیل و حەماس لە بەرەبەیانی ئەمڕۆوە دەستی پێکرد. دانیشتووانی غەززە لە بەرەبەیانەوە لە گۆڕەپانێکی ناوچەکە کۆببوونەوە کە دیلەکان ڕادەست دەکران.
لیواکانی عیزەددین قەسام باڵی سەربازیی حەماس لە گۆڕەپانەکەدا نووسراوەکانی تایبەت بە ئاڵۆگۆڕی دیلەکانیان واژۆ کرد و ڕادەستی خاچی سووری نێودەوڵەتیان کردن.
ژنە ئیسرائیلییەکان جلوبەرگی سەربازییان لەبەر کرابوو و دوای گەیشتنیان بۆ شوێنەکە سڵاویان لەو خەڵک کرد کە لە شوێنەکە وەستابوون. پێکەنین و خۆشحاڵی سەربازی ئیسرائیلییەکان سەرنجی هەموو لایەکی بۆ لای خۆی ڕادەکێشا.
لە چوارچێوەی ڕێککەوتنی نێوان ئیسرائیل و حەماس، بڕیارە چوار سەربازی ژنی ئیسرائیلی ئازاد و لەبەرامبەردا ٢٠٠ فەڵەستینی لە بەندیخانەکان ئازاد بکرێن.
