لە عێراق پلەبەرزکردنەوەی فەرمانبەران بەردەوامە، کەچی ئەنجوومەنی وەزیرانی هەرێمی کوردستان لە (٢٠١٦)ەوە پلەبەرزکردنەوەی مامۆستا و فەرمانبەرانی ڕاگرتووە لەكاتێكدا ئەو مافە بە یاسا دراوە بە فەرمانبەران، هەربۆیە عومەر گوڵپی لە حكومەتی هەرێم دەپرسێت: ئایا کاتی نەهاتووە ئەم ستەمە کۆتایی پێبهێنرێت و لیستی مووچە و شایستەی دارایی مامۆستایان و فەرمانبەران لەگەڵ بەغدا یەک بخرێت؟
عومەر گوڵپی، ئەندامی دەرچوو بۆ پەرلەمانی كوردستان لە فراكسیۆنی كۆمەڵ، كە حزبەكەی بەهۆی ناڕەزاییان لە ئەنجامی هەڵبژاردن تا ئێستا سوێندی یاساییان نەخواردووە سەبارەت بە پلەبەرزكردنەوەی فەرمانبەران بۆ (خەڵك) وتی، “ڕاگرتنی پلەبەرزکردنەوەی مامۆستایان و فەرمانبەران لە کاتێکدایە کە بە پێی یاسا ئەم مافە بۆ فەرمانبەران دابین کراوە و نە وەزارەتی دارایی و نە ئەنجوومەنی وەزیران بۆیان نییە مافێک یاسا بیدات بە هیچ پاساوێک ڕایبگرن”.
ڕاشیگەیاندووە، ڕاگرتنی پلەبەرزکردنەوە وەک لێبڕینی بەردەوامە لە مووچە، چونکە هەموو فەرمانبەران دوو تا سێ پلەیان لەلای حکومەتی هەرێمە و تا ئیستا بۆیان نەبەستراوە، کە هەر پلەیەک لەنێوان (٣٠،٠٠٠ تا ١٥٠،٠٠٠) دینار دەخاتە سەر مووچە بە پێی ئاست و پلەی فەرمانبەر، واتە بەهۆی پێنەدانی دوو پلەوە هەر فەرمانبەر و مامۆستایەک مانگانە نزیکەی (٦٠،٠٠٠ تا ٣٠٠،٠٠٠) دینار کەمتر لە مووچەکەی وەردەگرێت.
ئاماژەی بەوەشكرد، لە ئێستەدا بەغدا سەرقاڵی هەموارکردنی خشتەکانی مووچە و خەرجییە لە یاسای بودجە بۆ ساڵی (٢٠٢٥) بە بەشە بودجە و مووچەی هەرێمی کوردستانیشەوە، بۆیە ئەرکی ئەو لیژنانەیە، کە دەچنە بەغدا بۆ گفتوگۆی خشتەکانی مووچە کە لیستی مووچ ەو پارەی پێویست بۆ مووچە بە پلەبەرزکردنەوەوە جێگیر بکەن و کۆتایی بەم ستەمە بهێنن، کە 10 ساڵە لە مامۆستا و فەرمانبەر دەکرێت، هەروەها ئەرکی ئەندامانی کوردی پەرلەمانی عێراقیشە داکۆکی لەم ماف و شایستە داراییەی مامۆستایان و فەرمانبەران بکەن.
گوڵپی وتیشی، “ئەگەرچی بەغدا پلەبەرزکردنەوەکەی ڕانەگرتووە و هەرێمی کوردستان خۆی لەو کاتەی نەوتی بەبۆری دەفرۆشت ئەم کارە نایاساییەی کرد، هەروەها ئەنجومەنی وەزیران لە ساڵانی ڕابردوودا بەبێ گەڕانەوە بۆ بەغدا خۆی پلەبەرزکردنەوەی بۆ بواری سەربازی و سێ سەرۆکایەتییەکە و دادوەرەکان دەست پێکردەوە، بەڵام لە ئێستەدا کە لیستی مووچە بەپێی تێبینییەکانی بەغدا ڕێک دەخرێت، گرنگە کۆتایی بەم ستەمە بهێنرێت و ئەم دەرفەتە لە کیس نەدرێت و فەرمانبەر و مامۆستا ساڵی (٢٠٢٥)یش هاوشێوەی ساڵانی ڕابردوو نەبێت بۆیان و بە پلەی جیاوازەوە مووچەکانیان وەربگرن”.
