بەرەبەیانی ئەمڕۆ هەینی بارهەڵگرێک خۆی کێشا بە پردی گەلی عەلی بەگدا لەنێوان سۆران و هەولێر و درزێکی گەورە لە پردەکەدا دروستبووە و مەترسیی رووخانی هەیە.
کاروان میراودەلی، بەڕێوەبەری بەرگریی شارستانیی سۆران ڕایگەیاندووە: پردەکە 80٪ـی سەلامەتیی لەدەستداوە و پێویستە بگۆڕدرێت بە پردێکی نوێ، بۆیە هاتووچۆ لەو رێگەیەوە وەستاوە.
باسی لەوەشکرد، شۆفێران دەتوانن رێگەی بێخاڵ بەکاربهێنن، چونکە سەلامەت نییە ئۆتۆمبێلی بچووکیش بەسەر پردەکەدا بڕوات.
هاوکات دیلمان ئەحمەد، ئەفسەری بەڕێوەبەرایەتی هاتوچۆی سۆران بڵاویکردەوە: “بەرەبەیانی ئەمڕۆ ئۆتۆمبێلێکی جۆری ئیسکانیا تڕێلە خۆی کێشاوە بە پردی گەلی عەلی بەگ شوێنی گەیشتنی رووباری باڵەکیان و رواندز بەیەک”.
باسی لەوەشکردووە: لە ئەنجامی ڕووداوەکە شوفێرەکە برینداربوو، ڕووداوەکەش بووە هۆکاری داخستنی رێگاکە بە هۆکاری زیان گەیشتن بە پردەکەو مەترسی رووخانی هەیە.
