هێزەکانی سووریای دیموکرات ڕەتیدەکەنەوە بەنداوی تشرینیان چۆڵکردبێت و دەڵێن”لەژیر دەسەڵاتی خۆماندایە”.
هێزەکانی سووریای دیموکرات-هەسەدە-، لە بڵاوکراوەیەکدا ڕایگەیاند، بەنداوی تشرین لەژێر دەسەڵاتی هێزەکانی هەسەدەدایە و دەنگۆی گرتنی لەلایەن تورکیا و گرووپە چەکدارەکانی دوورە لە راستییەوە.
هاوکات فەرهاد شامی وتەبێژی هێزەکانی هەسەدە، لە گرتەڤیدیۆیەکدا لەسەر بەنداوەکە، رایگەیاند، هێزەکانمان تەواوی بەنداوی تشرینیان لەژیر دەستدایە، هەرچەندە تورکیا و گرووپە چەکدارەکانی سەر بەو چەند رۆژێکە بە چڕی بۆردومانی ناوچەکان دەکەن و هیرش دەکەن، بەڵام سەرجەمیان بەرپەرچدراونەتەوە.
فەرهاد شامی راشیگەیاند، ئەمڕۆ وەزارەتی بەرگری تورکیا رایگەیاندووە بەنداوی تشرینیان کۆنتڕۆڵ کردووە، سەرجەم ئەو هەواڵانە چەواشەکارین و هێزەکانی سوپای مونبج-کەبەشیکن لە هێزەکانی سووریای دیموکرات لە بەنداوی تشرینن و لەژێر کۆنتڕۆڵی خۆماندایە.
وتیشی، هێزە کوردییەکانی یەپەگە و یەپەژە و هەسەدە، سەرجەمیان بەشیکن لە هێزی بەرخودان و هێزەکانی سووریای دیموکرات، بەردەوام دەبین لە رووبەڕووبوونەوەی سوپای تورکیا و گرووپە چەکدارەکانی سەر بەو وڵاتە.
هاوکات هەر ئەمڕۆ پێنجشەممە 26ـی کانونی یەکەمی 2024، لە راگەیاندراوەکەیدا هێزەکانی سوریای دیموکرات (هەسەدە) دەڵێت، داوا لە گروپە چەکدارەکان دەکەن بەزوترین کات سەرێکانى و گرێ سپى جێبهێڵن و دڵنیایی تەواو دەدەنێ رێڕەوێکى پارێزراو بۆ رۆیشتنیان دەکەنەوە.
