ڕاوێژکارێکی پێشووی هاوپەیمانان لە بایەخی هەڕەشەکانی سەرۆکی تورکیا لە هێزەکانی سووریای دیموکرات کەمدەکاتەوە و دەڵێت ئەو لێدوانە جگە لە وتارێک بۆ جەماوەرەکەی هیچی تر نییە، چونکە ئەمریکا پێیویستی بەوەیە ناوچەیەک لە دەرەوەی دەسەڵاتی ئێستای دیمەشقدا بمێنێتەوە.
دوێنێ ڕەجەب تەیب ئەردۆغان، سەرۆک کۆماری تورکیا لە لێدوانێکیدا لەبەردەم فراکسیۆنی پارتی داد و گەشەپێدان لە پەرلەمانی تورکیا هەڕەشەی لە شەڕڤانانی ڕۆژئاوای کوردستان کرد و ڕایگەیاند، “یان دەبێت چەک دابنێن یان دەبێت لە نێو خاکی سووریادا بە چەکەکانیانەوە بنێژرێن”.
لەو بارەیەشەوە کازم وائیلی، ڕاوێژکاری پێشووی هاوپەیمانی نێودەوڵەتی دژی داعش ڕایگەیاند، ئەم لێدوانە جگە لە وتارێک کە ئاڕاستەی جەماوەر و لایەنگرانی لە سەرکردایەتی نوێی سووریا کردووە هیچی تر نییە.
وائیلی دەڵێت: “بوونی هێزەکانی سووریای دیموکرات،پەیوەستە بە بوونی ئەمریکییەکان لەسەر خاکی سووریا، چونکە هەسەدە هاوبەشییەکی ئەمنی-سەربازیی لەگەڵ ئەمریکییەکاندا هەیە، ئەویش بەو پێیەی پارێزەری ئەو زیندان و کەمپانەیە کە پڕن لە هەزاران پاشماوەی تیرۆریستانی داعش”.
وتیشی: هەسەدە “تاکە لایەنە لە سووریا کە لە ڕووی تایفەگەری و ئایینی و نەتەوەییەوە لایەنگری داعش ناکات، هەر بۆیە لە لایەن واشنتۆنەوە ئەرکی کۆنترۆڵکردنی ئەو ناوچانەی پێی سپێردراوە”.
ئەوەشیختسەڕوو کە ئەو ناوچانەی ئێستا بۆ ئەمریکییەکان و لە داهاتوودا بۆ ئیسرائیل گرنگن بۆ کورتکردنەوەی مەودای نێوان ڕۆژهەڵاتی فورات و ئێران و ئەگەر ئیسرائیلیش بیەوێت لە قووڵایی ناوخۆی ئێراندا گورز لە شوێنی گرنگ بوەشێنێت.
ڕاوێژکارەکەی پێشووی هاوپەیمانان نووسیوێتی: “یەکێک لە پرۆژەکانی ئەمریکا لە سووریا ئەوەیە کە ناوچەیەک لەدەرەوەی دەسەڵاتی دیمەشق هەبێت، ئەویش بەهۆی ئەوەی متمانەی نییە بە سەرکردایەتی نوێ سووریا و ئەو ئاژاوە یان شەڕانەی کە لە داهاتوودا لە نێوان ئەو گروپانەدا ڕوو دەدەن کە ڕژێمی ئەسەدیان ڕووخاند”.
