لە دوای ڕووخانی ئەسەدەوە ئەنقەرە پاڵپشتی لە هێرشێک دەکات کە لەلایەن گروپە چەکدارەکانەوە بۆ سەر هێزە کوردییەکان دەستیپێکردووە، کە بەشێک لەباکووری سووریایان کۆنتڕۆڵکردووە، لەمبارەیەوە وەزیری دەرەوەی ئەڵمانیا هۆشداری دایە تورکیا لە پەرەسەندنی ململانێکان لەگەڵ یەکە کوردییەکان و ترسی خۆی دەربڕی لەوەی داعش دۆخەکە بقۆزێتەوە.
ئانالینا بیربۆک، وەزیری دەرەوەی ئەڵمانیا هۆشداریی دا، لە شەڕی نێوان تورکیا و شەڕڤانانی کورد لە سووریاو لە لێدوانەکانیدا بۆ وێستگەی “دۆیچلاندفانک”ی ئەڵمانی وتی: “ئەمە ڕێک ئەوەیە کە نابێت ڕووبدات”، ئاماژەی بەوەشکرد، شەڕی نیوان ئەو دوو لایەنە، سوودی بۆ کەسیان نابێت و لایەنی سێیەم لە ململانێکەدا کە داعشە ئاریشەکانی نێوانیان دەقۆزێننەوە و دەبنەوە مەترسی بۆسەر ناوجەکە و جیهان”.
پێگەی دۆیچە ڤێللای ئەڵمانی بڵاویکردووەتەوە، بەگوێرەی زانیاری سەرچاوە کوردییەکان، تورکیا و میلیشیا هاوپەیمانەکانی خۆیان بۆ هێرشکردنە سەر شاری سنووری کۆبانی لەباکووری سووریا ئامادە دەکەن، کە ماوەیەکە شەڕی توند لەدەوروبەری شارەکە و لە ناوچەکانی باکووری سووریا بەردەوامە.
لە دوای کەوتنی بەشار ئەسەد، لە ٨ی کانوونی دووەم، ئەنقەرە پاڵپشتی هێرشێک دەکات کە لەلایەن گروپە چەکدارەکانەوە دەستیپێکردووە دژی ئەو هێزە کوردییانەی کە بەشێک لە باکووری سووریایان کۆنترۆڵکردووە.
پێگە ئەڵمانییەکە دەڵێت؛ لەماوەی ڕابردوودا تورکیا چەندین جار ئۆپەراسیۆنی سەربازی لە دژی یەکینەکانی پاراستنی گەل(یەپەگە) لەباکووری سووریا ئەنجامدا و ناوچە سنوورییەکانی بەپاڵپشتی بەکرێگیراوان داگیرکردووە و بە شەڕی “تیرۆر” پاساوی بۆ کردەوەکانی هێناوەتەوە.
هاوکات ئەنقەرە، هێزەکانی سووریای دیموکرات، کە گروپێکی سەرکردایەتی کوردە و لەلایەن ئەمریکاوە پاڵپشتی دەکرێت، وەک درێژکراوەی دوژمنە سەرەکییەکەی، “پارتی کرێکارانی کوردستان”، دەڕوانێت، لەکاتێکدا میلیشیا کوردییەکان هاوبەشێکی گرنگن بۆ ئەمریکا لە شەڕی دژی چەکدارانی داعش لە سووریا.
تۆبیاس تونکڵ، بەڕێوەبەری بەشی ڕۆژهەڵاتی ناوەڕاست و باکووری ئەفریقا لەفەرمانگەی دەرەوەی ئەڵمانیا لە بەرلین، لە پلاتفۆرمی “X” ڕایگەیاند؛ کە چاوپێکەوتنێکی لەگەڵ مەزلوم عەبدی، فەرماندەی هێزەکانی سووریای دیموکرات، ئەنجامداوە.
تونکڵ نووسیویەتی: لەگەڵ فەرماندەی هێزەکانی سووریای دیموکرات، مەزلوم عەبدی، باسم لە پەرەسەندنی گرژییەکانی کۆبانی و هەنگاوی بەپەلە بۆ هێورکردنەوەیان کرد، هەڵکشانی نێوان هێزەکانی سووریای دیموکرات و هێزەکانی سەر بەتورکیا وێرانکەر دەبێت بۆ هاووڵاتیانی سیڤیل.
لە لایەکی دیکەوە، ئەنتۆنی بلینکن، وەزیری دەرەوەی ئەمریکا لەناوەڕاستی مانگی کانوونی دووەمدا پشتڕاستی کردەوە کە هێزەکانی سووریای دیموکرات “پێویستن” بۆ ڕێگریکردن لە گەڕانەوەی دەسەڵاتی “دەوڵەتی ئیسلامی” (داعش) لەسووریا.
لای خۆشییەوە وەزیری دەرەوەی ئەڵمانیا ئانالینا بیربۆک، وەبیری هێنایەوە کوردەکان ئەوانە بوون کە ڕووبەڕووی “تیرۆریستانی داعش” بوونەوە لەسووریا، ئەوان ڕووبەڕووی گرووپێک بوونەوە کە لەدڕندەیدا بێ وێنە بوون.
جەختیشی لەوە کردەوە؛ تورکیا “بێگومان” بەرژەوەندی ئەمنی ڕەوای هەیە، وەک هەر وڵاتێکی دیکە دەیەوێت دوور بێت لە تیرۆر، لە بەرامبەردا نابێ ئەمە بقۆزرێتەوە بۆ ئەوەی “جارێکی دیکە کورد پەراوێز بکات و دووبارە توندوتیژی دژیان بەکاربهێنێت”.
