شارەزایەكی كەشناسی ڕایدەگەیەنێت، دروست بوونی هێڵی سپی فڕۆکە لەئاسمانی ناوچەکان زیانی نیه لەسەر تێکچوونی شەپۆلهکانی دابارین بەپێچەوانەوە نیشانەیەکی باشه.
ماوەیه کە هێڵی سپی فڕۆکە لەناوچە جیاوازەکانی هەرێم دەبینرێت بەشێوەی بازنەیی و ڕاستەکی یان شێوەی تر ئەمەش دروست دەبێت لەئەنجامی ئەو هەڵمەی بزوێنەری فڕۆکەوە بەبوونی شێی پێویست و گونجاو و بەرەی هەوای سارد لەچینە بەرزەکانی هەوادا هێڵێک بەشێوەی هەوری سپی دروست دەبێت لەدوای فڕۆکەوە هەتاوەکو شێ لەچینە بەرزەکانی هەوادا زیاتر بێت ئەو هێڵە سپیانە زیاتر دروست دەبێت و دەردەکەون و زیاتر دەمێنێتەوە.
ماوەیه کە لەسۆشیاڵ میدیا و تۆڕە کۆمەڵایەتیەکان دەنگو باسی زۆری ئەم هێڵانەیه، کەگوایه نیازی خراپیان هەیە ئەم فڕۆکانە بۆ تێکدانی شەپۆلەکانی دابارین گاز دەرێژن.
شاڵاو هیدایەت، شارەزای كەشناسی بۆ (خەڵك) وتی، “من دڵنیایی دەدەمە هەموو لایەک کەهیچ زیان و کاریگەری خراپیان نیە و دروست بوونی ئەو هێڵە سپیانە و سوڕانەوەی ئەو فڕۆکانە و بینیان بەشێوەی زیاتر لەجاران ڕەنگە بۆ مەبەستی تر بێت وەک مەشق کردن و هتد. .. نەک تێکدانی کەشوهەوا و شەپۆلەکانی دابارین”.
ڕاشیگەیاند، ئەمساڵ هەر لەسەرەتای وەرزی دابارینەوە ئەم هێڵە سپیانە دروست دەبن ئەمەش یەکێکە لەنیشانە باشەکان، چونکە لەچینە بەرزەکانی هەوادا شێی پێویست و باش هەیە و وتیشی، “شێی سەتحی واتا شێی نزیک ڕووی زەوی ماوەیەکە کەمە بەهۆکاری نەهاتنی شەپۆلی باشی دەریایی و کەمبوونی ڕووپۆشی سەوزایی”.
ئاماژەی بەوەشدا، لەهەفتەی کۆتایی ئەم مانگەوە شەپۆلی باشی دەریایی هەیه و سەڕەرای ئەوەی ماوەی ڕابردووی ئەم مانگەش شەپۆلەکان بەشێوەی لاواز بۆ مام ناوەند گەیشتونه ناوچەکە دڵخۆشکەرە، چونکە ڕێ بۆ هاتنی شەپۆلەکانی دواتر دەکاتەوە و ناوچەکە شێدارتر دەکات و لەمەودوا گەنم و جۆ و گژوگیا زیاتر دەڕوێت بەمەش شێی خاک و سەتحی زیاد دەکات بێ گومان ئەمەش لەداهاتودا کاریگەری گەورە و ئەرێنی دەبێت لەسەر شەپۆلەکان هەم تێکچوونیان کەم دەکاتەوە یان نایانهێڵێ هەم باشتریان دەکات.
جەختیشی كردەوە،مادام ئەو هێڵە سپیانەی فرۆکە ئەمساڵ زۆرن، گەشبینم زۆر کە وشکەساڵی ڕوونادات، چونکە لەپێش هەموو شەپۆلەکاندا لەئیدارەی ڕاپەرین بینیومن هەموو جارێ هەر لەسەرەتای وەرزەوە و زووتریش .
