توركیا هێز لەسەر سنوورەكانی كۆبانێ لە ڕۆژئاوای كوردستان كۆدەكاتەوە و شەڕی نێوان هێزەكانی سوریای دیموكرات (هەسەدە) و گرووپە چەكدارییەكانی سەر بە توركیا لە نزیك بەنداوی تشرین دەستی پێكردەوە.
ڕۆژنامەی (وۆڵ ستریت جۆرناڵ) بڵاویكردۆتەوە، بەپێی لێکدانەوەی بەرپرسانی ئەمریکا ئەو جموجوڵە سەربازییەی سوپای تورکیا لەناوچە سنورییەکانی سووریا بۆ گواستنەوەی چەک و پێداویستی سەربازی دەستیپێکردووە، ئاماژەیەکی مەترسیدارە کە تورکیا بەنیازە لەگەڵ گرووپە چەكدارە هاوپەیمانەکانی، هێرشێکی فراوان بکەنەسەر ناوچەکانی ژێر کۆنترۆڵی هەسەدە.
بەپێی هەواڵی ڕۆژنامەكە، ڕێژەیەکی زۆری چەکدار و کۆماندۆ بەجلی فەرمیی سوپای تورکیاوە لەسەر سنوور و نزیک شاری کۆبانێ جێگیربوون، کە ئاماژەیە بۆ نزیکبوونەوەی هێرش.
ئەمە لەكاتێكدایە، كە هێزەکانی ئەمریکا بۆ ڕێگری لە هێرشی سوپای تورکیا، بەشێک لە هێزەکانیان لە ڕۆژئاوای كوردستان لە سەنتەری شاری کۆبانێ جێگیرکرد و ئاڵای ئەمریکایان هەڵکرد.
هاوكات، دوای ڕاگەیاندنی شكستی ڕێكككەوتنی توركیا و هەسەدە، ئەمڕۆ سێ شەممە گروووپە چەكدارە سوورییەكانی سەر بە توركیا لە نزیك بەنداوی تشرین هێرشیان بۆ سەر هێزە كوردییەكان و هەسەدە لە ڕۆژئاوای كوردستان دەستپێكردەوە و ژمارەیەكی زۆر لەو چەكدارانە كوژراون.
بەپێی تۆمارە ڤیدیۆییەكان، لە ئێستادا لە نزیك بەنداوی تشرین شەڕ بەردەوامە.
لای خۆشیەوە، ئەنالینا بێربۆك، وەزیری دەرەوەی ئەڵمانیا ڕایگەیاند، توركیا بەرپرسیارە لە پاراستنی یەكگرتوویی خاك و ئاشتی لە سووریا و وتیشی، “دەبێت كۆتایی بە شەڕ و خوێنڕێژی لە سووریا بێت.
وتیشی، “كۆبانێ سیمبولی ئازایەتی كوردانە لە شەڕكردن دژی داعش”.
