پێش دەستپێکردنی دابەشکردنی مووچەی وەزارەتی پەروەردە، مووچەی دەیان هەزار مامۆستای بەشداربووی پرۆژەی هەژماری من خرایە سەر هەژمارە بانکییەکانیان.
ئەمڕۆ سێشەممە، پرۆژەی “هەژماری من” ڕایگەیاند زیاد لە 50,000 مامۆستا ئەمڕۆ مووچەکانیان خراوەتە سەر هەژماری بانکییان و لە شارەکانی هەرێمی کوردستان و ئامێرەکانی ڕاکێشانی پارە خەریکی ڕاکێشانی مووچەکانیانن.
ئەمەش لە کاتێکدایە کە بڕیارە ڕۆژی شەممە، دەست بە دابەشکردنی مووچەی تشرینی یەکەمی وەزارەتی پەروەردە بکرێت.
“هەژماری من”، ئەوەشی خستەڕوو کە لەم چەند ڕۆژەی داهاتوودا مووچەی مانگی تشرینی یەکەم دەخرێتە سەر هەژماری بانکیی زیاد لە 191,000 مووچەخۆری بەشداربوو لە هەژماری من.
ڕاشیگەیاند، لەگەڵ ئەم پێشکەوتنە بەردەوامەی پڕۆژەی هەژماری من لە بەدیجیتاڵکردنی مووچەی مووچەخۆرانی هەرێمی کوردستان، تاکو ئێستا زیاد لە 300 ئامێری ڕاکێشانی پارە بەردەستخراون لە سەرانسەری هەرێمی کوردستان بۆ ئاسانکاری زیاتری مووچەخۆران.
