وەزارەتی دارایی هەرێمی کوردستان ڕایگەیاند بەغداد بەشێک لە پارەی مووچەی مانگی تشرینی دووەمی خستە سەر هەژماری بانکی وەزارەتەکەیان.
وەزارەتی دارایی هەرێمی کوردستان ڕایگەیاند، ئەمڕۆ سێشەممە “لەلایەن وەزارەتی دارایی حکومەتی فیدراڵیەوە بڕی 631 ملیار و 335 ملیۆن دینار لە کۆی پارەی مووچەی مانگی تشرینی دووەمی فەرمانبەران و مووچەخۆرانی هەرێمی کوردستان خرایە سەر هەژماری بانکی وەزارەتمان لە لقی هەولێری بانکی ناوەنی عێراق”.
وەزارەتەکە هیچ زانیارییەکی دەربارەی کاتی دەستپێکردنی دابەشکردنی مووچەی مانگی 11 بڵاونەکردووەتەوە.
پێشتریش ڕێباز حەملان، بریکاری وەزارەتی دارایی عێراق ڕایگەیاند، بەشێکی دیکەی پارەی مووچەی مانگی تشرینی دووەم بۆ هەرێمی کوردستان نێردراوە، بەڵام کورتهێنانی گەورەی هەیە، چونکە هەرێمی کوردستان پێویستی بە 996 ملیار دینارە بۆ مووچە.
ئەوەشی خستەڕوو کە هەوڵ دەدەن لە ڕێی گواستنەوە لە پشکی بودجەی هەرێمدا کێشەی کورتهێنانەکە چارەسەر بکەن.
