بەڕێوەبەری گشتیی دیوان لە وەزارەتی ناوخۆی هەرێمی کوردستان ڕایگەیاند، داوا لە هاووڵاتییان دەکەین سیمکارتەکانی خۆیان بە بەشێک لە ناسنامەکانی خۆیان هەژمار بکەن، بۆ هەر سیمکارتێکی تۆمار نەکراو ڕووبەڕووی سزا دەبنەوە کە سزاکەی سێ ملیۆن دینارە.
ئەمڕۆ دووشەممە، هێمن میرانی، بەڕێوەبەری گشتیی دیوانی وەزارەتی ناوخۆی هەرێمی کوردستان لە کۆنگرەیەکی ڕۆژنامەوانیدا ڕایگەیاند: “کاتێک هێزە ئەمنییەکان دەیانەوێت بگەنە تاوانبارێک، دەبینن سیمکارتەکەی فرۆشراوە، لەبەر ئەوە داوا لە هاووڵاتییان دەکەین سیمکارتەکانی خۆیان بە بەشێک لە ناسنامەکانی خۆیان هەژمار بکەن، هیچ سیمکارتێکی تۆمارکراو بە ناوی خۆیان لە بازاڕ نەفرۆشن، تا بەناوی کڕیار تۆماری دەکەن.
باسی لەوەشکرد: “ئەو دوکاندارانەی کاری مۆبایل فرۆشتن دەکەن، لە تەنیشت کارەکەیان کاری کڕین و فرۆشتنی سیمکارتیش دەکەن، ئەگەر بریکار و تۆمارکراو نەبن، داوایان لێ دەکەین واز لە کاری سیمکارت کڕین و فرۆشتن بهێنن، چونکە ڕەنگە قازانجەکەی چەند هەزارێک بێت، بەڵام بە گوێرەی ڕێنماییەکانی ئێمە، هەر کەسێک سیمکارتی تۆمارکراو بەناوی کەسێکی دیکەوە بفرۆشێت بە بڕی سێ ملیۆن دینار سزا دەکرێت”.
هێمن میرانی، ئەوەشی باسکرد: “لە ڕابردوودا جۆرێک لە هۆشیاری دراوە و هەڵمەتیش کراوە، بەڵام بەپێی ڕێنماییەکانی وەزارەتی ناوخۆ و ئیدارە سەربەخۆکان، لە ئەمڕۆ بەدواوە هەڵمەتی بەسەرکردنەوەی ئەو دوکانانەی کە مۆبایل و سیمکارت لە بازاڕ دەفرۆشن، دەست پێ دەکەن بۆ دەست بەسەرداگرتنی سیمکارتی تۆمارنەکراو”.
