سەرۆکی لیژنەی دارایی ئەنجومەنی نوێنەران ڕایگەیاند هەوڵ بۆ نەهێشتنی ناکۆکییەکان لەگەڵ هەرێمی کوردستان دەدەن و دەیانەوێت دەست بە هەناردەکردنەوەی نەوت بکاتەوە.
عەتوان عەتوانی، سەرۆکی لیژنەی دارایی ئەنجومەنی نوێنەران سەبارەت بە کێشەی خەرجیی کۆمپانیاکانی نەوت لە هەرێمی کوردستان ڕایگەیاند خەرجی بەرهەمهێنانی نەوت لە بەسڕە و ناسڕییە جیاوازە لە کێڵگە نەوتییەکانی هەرێمی کوردستان کە لەوێ گرێبەستەکانیان هاوبەشییە و ئەوەش تەواو جیاوازە لەو گرێبەستانەی کە حکومەتی فیدراڵی ئەنجامیداون.
ڕوونیشیکردەوە کە ئامانج لە لێکگەیشتنەکان لەگەڵ هەرێمی کوردستان بریتییە لە دۆزینەوەی میکانیزمێکی گونجاو بۆ یەکخستن ئەو بۆچوونەکان سەبارەت بە نرخی نەوت و دەستپێکردنەوەی هەناردەکردنی نەوتی هەرێمی کوردستان.
ئەوەشی خستەڕوو کە لەگەڵ حکومەتی هەرێمدا گەیشتوونەتە لێکگەیشتنێکی سەرەتایی بۆ ئەوەی گرێبەستەکان لە هاوبەشیی بەرهەمهێنانەوە بگۆڕدرێن بۆ هاوبەشیی لە قازانجدا، دوای ئەوەش لیژنەی دارایی لەو بارەیەوە لەگەڵ وەزارەتی نەوت کۆبووەوە، لەگەڵ وەزارەتی داراییشدا کۆدەبێتەوە.
سەبارەت بە داهاتی نەوتیش عەتوان عەتوانی ڕایگەیاند، “ژمارەکانی حکومەتی هەرێمی کوردستان جاوازن لەوەی حکومەتی فیدراڵی باسیان دەکات و ئێمە ئەو داتایانە لێکدەدەینەوە، لە میانی دیدارەکانیشماندا لەگەڵ بەرپرسانی هەرێمدا جەختمان لە یەکخستنی پێناسە گومرگییەکان و دەروازە سنوورییەکان و ڕێکخستنەوە و زیادکردنی داهات کردەوە، هەرێمیش چەند قۆناغیێکی باشی بڕیوە لەوبارەیەوە، هەروەک جەختمان لە بەبانکیکردنی مووچەی سەرجەم فەرمانبەرانی هەرێم کردەوە”.
سەرۆکی لیژنەی دارایی ئەنجومەنی نوێنەران دووپاتیشیکردەوە کە لە ڕێی گفتوگۆکان و سەردانەکانیان بۆ هەرێمی کوردستانەوە دەیانەوێت کۆتایی بە ناکۆکییەکان بهێنرێت و هەرێم دەست بە هەناردەکردنەوەی نەوت بکاتەوە.
