سەرۆکی پارتی دیموکراتی کوردستان ڕایگەیاند تێڕوانینەکەی سەرۆکی تەحریری شام دەربارەی کورد و داهاتووی سوریا جێگەی خۆشحاڵییە و پێشوازیی لێ دەکەین.
ئەمڕۆ یەکشەممە، مەسعود بارزانی، سەرۆکی پارتی دیومکراتی کوردستان پەیامێکی لەسەر لێدوانەکەی ئەحمەد شەرع، سەرۆکی دەستەی تەحریری شام سەبارەت بە کورد بڵاوکردەوە و تێیدا هاتووە: “لێدوانێکی بەڕێز یەحمەد شەرعم لەبارەی گەلی کورد لە سووریا بینی کە گەلی کوردی وەک بەشێک لە نیشتیمان و هاوبەش لە سوریای داهاتوو وەسفکردبوو.
ئەم تێڕوانینە بۆ کورد و داهاتووی سوریا جێگەی خۆشحاڵییە و پێشوازیی لێ دەکەین و هیوادارین ئەمە دەستپێکێک بێت بۆ ڕاستکردنەوەی ڕێڕەوی مێژوو و ڕاستکردنەوەی ئەو مامەڵە هەڵە و نادروستەی لەبەرانبەر گەلی کورد لە سووریا ئەنجام دەدرا”.
سەرۆکی پارتی ڕاشیگەیاند، “ئەم جۆرە تیڕوانینە ڕێخۆشکەرە بۆ بنیاتنانی سووریایەکی بەهێز و پێویستە کورد و عەرەب و سەرجەم پێکهاتەکانی تری سووریا سود لەم دەرفەتە وەربگرن بۆ ئەوەی پێکەوە لە دامەزراندنی سووریایەکی سەقامگیر و ئازاد و دیموکرات بەشدار بن”.
پەیامەکەی بارزانی دوای ئەوە هات کە سەرۆکی تەحریری شام ڕایگەیاند کورد بەشێکە لە نیشتمانی سووریا و بەڵێنی گەڕانەوەی ئەو خێزانانەشی دا کە ناچاربوون ماڵ و حاڵیان لە عەفرین بەجێبهێڵن.
