وەزیرێکی کورد لە حکومەتی عێراق دەڵێت، مووچەی فەرمانبەرانی هەرێمی کوردستان هەندێک کێشەی تەکنیکی هەیە و کێشەکانیش بەرەو چارەسەربوون دەچن.
ئەمڕۆ یەکشەممە، بەنگین ڕێکانی، وەزیری ئاوەدانکردنەوەی عێراق دەربارەی کێشەی مووچەی فەرمانبەرانی هەرێمی کوردستان ڕایگەیاند، هەندێک لێکتێنەگەیشتن و کێشەی تەکنیکی هەیە لە نێوان وەزارەتی دارایی هەرێم و عێراق.
ڕاشیگەیاند ئێستا شاندێکی وەزارەتی دارایی هەرێم لە بەغدادە و سبەینێ بڕیار دەدرێت و کێشەکە بەرەو چارەسەربوون دەچێت.
ئەمڕۆ ئاوات شێخ جەناب، وەزیری دارایی بە سەرۆکایەتی شاندێک گەیشتە بەغداد و بڕیارە لەگەڵ تەیف سامی، وەزیری دارایی عێراق کۆبێتەوە.
هونەر جەمال، وتەبێژی وەزارەتی دارایی ڕایگەیاند، ئاامنجی سەردانەکە چارەسەرکردنی کێشەی مووچەی سێ مانگەکە و تاوتوێکردنی هەمواری یاسای بودجە و پشکی هەرێمی کوردستان دەبێت لە بودجەی گشتیدا.
سەردانەکە لە کاتێکدایە کە نیوەی مانگی 12 تێپەڕیوە و تا ئێستا مووچەی مانگی 10 و 11 دابەش نەکراوە.
