ڕابەری گشتی بزووتنەوەی ئیسلامی بە بۆنەی ڕووخانی ڕژێمی بەشار ئەسەدەوە پەیامێکی پیرۆزبایی ئاڕاستەی فەرماندەی دەستەی تەحریری شام کرد و دەڵێت دڵخۆشتانکردین.
ئەمڕۆ یەکشەممە، عیرفان عەلی، ڕابەری گشتی بزووتنەوەی ئیسلامی پەیامێکی ئاڕاستەی ئەحمەد شەرع (ئەبو محەمەد جۆلانی)، فەرماندەی تەحریری شام کرد و تییدا هاتووە: “برای بەڕێزم فەرماندە ئەحمەد شەرع، فەرماندەی ڕاپەڕینی گەلی سووریای دراوسێ و خۆشەویست و هاوڕێیانتان لە ژووری ئۆپەراسیۆنەکان، پێش خەڵکی سووریای شۆڕشگێڕ، دڵی سەرجەم موسوڵمانان و خەباتگێڕانی جیهانتان خۆشکرد بەو ڕاپەڕینە مەزنە، خوای گەورەو میهرەبان پشتیوانتان بێت و ماوەی ڕاگوزەری بە باشیی تێپەڕێنن، ئەوەی کە گرنگە جیهان ئێستا چاوی لەسەر ئێوەی ئازیزە چۆن ئەو قۆناغە تێدەپەڕێنن”.
عیرفان عەلی داوای لە فەرماندەی تەحریی شام کردووە “سیستەمێکی مەدەنی لە سووریادا دابمەزرێنن، کە ببێتە سەرچاوەیەکی باش بۆ حوکمرانییەكی ڕەشید کە تەواوی هاووڵاتیانی سووریا لێی بەهرەمەندبن و ببێتە شانازی بۆ سەدان ملیۆن مسوڵمان”.
ئەوەشی خستووەتەڕوو کە گرنگە “تێگەیشتن لەو پەیوەندییە ئاڵۆزە نێودەوڵەتیانە و بە هۆشیاری مامەڵەکردن لەگەڵ ڕووداوەكان كە دوور بێت لە عاتیفە”.
داواشی لێ کردووە کە “گرنگی تەنها بە سووریا بدەن و خۆتێوەنەگلان لە کێشەی گەلانیتر، چونكە هەر گەلە و تایبەتمەندی خۆی هەیە”.
ڕابەری گشتی بزووتنەی ئیسلامی ئامۆژگاری فەرماندەی تەحریری شام دەکات ئەو فیقهە سیاسییە كۆنە تێبپەڕینن كە لەگەڵ ئەم واقیعەی مسوڵمانان ناگونجێت و بەرهەمهێنانی فیقهی سیاسی نوێ بۆ ئەم واقیعە.
