دامەزراوەی بەرهەمهێنانی میدیایی (بی بی سی) بەریتانی، لیستی ١٠٠ کاریگەرترین ژنانی جیهانی بۆ ساڵی ٢٠٢٤دا بڵاوکردەوە، كە دووان لەوان كوردن و بریتین لە (نادیە موراد، هەڵگری خەڵاتی نۆبڵی ئاشتی و ڕزگاربوی دەستی داعش) و (ژینا مودەڕیس گۆرجی، چالاكوان و ڕۆژنامەنووسی کوردی ڕۆژهەڵاتی کوردستان، كە ئێستا زیندانی كراوە).
تۆڕی هەواڵی (BBC)ی بریتانی لیستی 100 ژنە كاریگەرەكانی ئەمساڵی بڵاوكردەوە، كە هەریەكە لە نادیە موراد، چالاكوان و هەڵگری خەڵاتی نۆبڵی ئاشتی و هاوكات ڕزگاربوی دەستی داعش و داکۆکیکاری مافی ئەو ژنانەیە کە روبەڕوی توندوتیژیی بونەتەوە، هەروەها ژینا مودەڕیس گورجیش لە لیستەكەدا هەیە، كە چالاكوان و ڕۆژنامەنوسێكی كوردی ڕۆژهەڵاتی كوردستانە و یەكێكە لەوانەی داوای ریفۆڕمی یاسای ژنانی لە ئێران كردوە و ئێستا لە زیندانیكراوە.
نادەیە موراد براوەی خەڵاتی نۆبڵی ئاشتیە و ئێستا داکۆکیکاری ڕزگاربوانی توندوتیژی سێکسیە، چالاکوانی مافی مرۆڤ و ڕزگاربوی جینۆسایدی ئێزیدییەكانە لە عێراق، كاتێك کە دەوڵەتی ئیسلامی (داعش) لە ساڵی 2014 ئەنجامیدا.
چەکدارانی داعش نادیە موراد دەگرن و ناچاری بە كۆیلایەتی دەكەن و دەستدرێژی دەكەنە سەری، بەڵام دوای سێ مانگ نادیە توانی ڕزگاری بێت و بە شێوەیەکی بوێرانە و بێترس، باسی لەو ستەم و دەستدرێژییانە کرد کە لەو ماوەیەدا دژی ئەنجامدرابون.
لە ساڵی ٢٠١٩ ژینا مودەڕس گورجی ئەنجومەنی ژنانی “ژیڤانۆ”ی دامەزراندووە، ئەم کۆمەڵەیە لە ڕێگەی پەروەردە، ناڕەزایی دەربڕین و هەوڵەکانی داکۆکیکردن بەرەنگاری توندوتیژی دژی ژنان دەبێتەوە.
دەشڵێن، لە سەرەتای دەستپێکردنی شۆڕشی “ژن، ژیان، ئازادی” ژینا مودەڕس گورجی دوو جار دەستگیرکراوە و سەرەتا بە ٢١ ساڵ زیندانی سزا دراوە، بە تۆمەتی “پڕوپاگەندە دژی دەوڵەت”، بەڵام ئێستا سزای دوو ساڵ و چوار مانگ لە زیندانی سنە بەسەردەبات.
هەروەها ژینا گورجی ئەندامی هەڵمەتی “یەک ملیۆن ئیمزا” بوو کە بە ئامانجی کۆکردنەوەی پشتیوانی خەڵک بۆ چاکسازی یاسای جیاکاری دژی ژنان دامەزرا. ئەو کۆمەڵێک وێنەگری ژنی کوردی کۆکردووەتەوە، پۆدکاستێکی لەسەر ژنان بەرهەم هێناوە و کتێبێکی منداڵانی لەسەر ئیلهام بەخشین بە ژنانی کورد بەرهەمهێناوە.
هاوكات، لە مانگی حوزەیرانی ئەمساڵدا، ژینا مودەریس گورجی ژنە ڕۆژنامەنووسی کورد و چالاکوانی مافەکانی ژنان لەلایەن لقی یەکەمی دادگای شۆڕشی سنە ٢١ ساڵ زیندانیی کردنی بەسەردا سەپێندرا و دواتر سزاکەی لەلایەن لقی ٤ـی دادگای سنە بۆ ٢٦ مانگ زیندانی گۆڕدرا، پاشان بەپێی ماددەی ١٣٤، سزاکەی بۆ ١٦ مانگ زیندانی کەم کرایەوە.
