کەشناسی: بەراورد بە پارساڵ بڕی بارانبارین ئەمساڵ زیاتر بووە

بەڕێوەبەری گشتی کەشناسی سلێمانی ڕایگەیاند، لەم هەفتەیە رەوشی کەشوهەوا بە جێگیری دەمێنێتەوە و پلەکانی گەرماش لە هەفتەی داهاتووەوە بەرزتر دەبنەوە.

ئاسۆ کەمال، بەڕێوەبەری گشتی کەشناسی سلێمانی بە “تۆڕی میدیایی خەڵک”ی ڕاگەیاند: دۆخی کەشوهەوا بەهۆی بەرزە پەستانێکەوە کە ناوچەکەی گرتووەتەوە تاڕادەیەک جێگیرەو هیچ شەپۆلێکی بارانبارین لەم هەفتەیەدا نییە.

باسی لەوەشکرد: لە کۆتایی هەفتەو سەرەتای هەفتەی داهاتوو پلەکانی گەرما بە رێژەیەکی زیاتر لەوەی ئێستا هەیە بەرزتر دەبێتەوە و دۆخەکەش وەک خۆی بەردەوام دەبێت و کەشوهەوا خۆش دەبێت.

لە بارەی جیاوازی بڕی بارانبارینی ئەمساڵ و پارساڵەوە ئاسۆ کەمال، بەڕێوەبەری گشتی کەشناسی سلێمانی وتی: “ئەمساڵ تا ئێستا لە سەنتەری شاری سلێمانی و دەوروبەری زیاتر لە 140 ملیمەتر بارانباریوە، لە کاتێکدا پارساڵ لەم کاتەدا 79.4 ملیمەتر باران باریبوو.

هاوکات کەشناسی هەرێم بەرزترین پلەکانی گەرمای ئەمڕۆی شارەکانی هەرێمی کوردستانی بڵاوکردەوە کە بەم جۆرەی خوارەوەن:

هەولێر: 17 پلەى سیلیزى

سلێمانی: 16 پلەى سیلیزى

دهۆک: 16 پلەى سیلیزى

کەرکوک: 17 پلەى سیلیزى

هەڵەبجە: 16 پلەى سیلیزى

زاخۆ: 17 پلەى سیلیزى

حاجی ئۆمەران: 4 پلەى سیلیزى

سۆران: 14 پلەى سیلیزى

گەرمیان: 19 پلەى سیلیزى