هێزەكانی سوریای دیموكرات ڕایدەگەیەنێت، تورکیا لەپشت هێرشەکانی سوریاوەیە و ئامانجی تورکیا داگیرکردنی تەواوی سوریایە و دەشڵێت: -پلانی لەنێوبردنی فراوان دژی گەلەکەمان، لە حەلەب و شەهبا لەئارادایە.
ناوەندی ڕاگەیاندنی هێزەکانی سوریای دیموکرات “هەسەدە” لە ڕاگەیەنراوێكدا ئاماژەی بەوەكردووە، لەماوەی ئەم هەفتەیەدا هێرشێکی زۆر بەرفراوان بەڕێوەدەچێت و گۆڕانکاری بنەڕەتی ڕوودەدات، هێزەکانی ڕژێمی دیمەشق لە زۆر ناوچە و بە شێوەیەکی سەرەکی لە حەلەب لەناوچوون، بێگومان ئەم هێرشە ڕاستەوخۆ لەلایەن داگیرکەری تورکیاوە بەڕێوەدەبرێت و ئامانجیشی داگیرکردنی تەواوی خاکی سوریایە.
ڕاشیگەیاندووە، بەم شێوەیە نایەنەوێت خەڵکی ناوچەکە بە ئاشتی لەگەڵ کورد و عەرەب و هەموو پێکهێنەرەکانیان بژین، هەر لەبەر ئەم هۆکارەش هێرشێکی بەرفراوان بۆ سەر ناوچە ئۆتۆنۆمییەکان دەکرێت، هەروەها پلانێکی بەرفراوانی جینۆساید لە دژی گەلەکەمان لە شەهبا و حەلەب هەیە، ئەم دۆخە دۆخێکی مێژووییە بۆ هەموو گەلی سوریا و بەتایبەتی بۆ ناوچە ئۆتۆنۆمییە دیموکراسییەکان.
ئاماژەی بەوەشكردووە، ئامانج لەم هێرشانە تەنیا ناوچەکانی ژێردەسەڵاتی هێزەکانی هەسەدە نییە، بەڵکو لەشکرکێشی بۆ سەر خاکی سوریا بەگشتییە، لە چەند ڕۆژی ڕابردوودا شەڕڤانانمان چ لە بەرەی مەنبەج یان لە بەرەی ڕۆژئاوای فورات لە دژی ئەو هێرشانە لە شەڕدان بێگومان هێزەکانی سوریای دیموکرات بە هەموو پێکهاتەکانییەوە، وەک چۆن ئەرکی خۆیان بەجێ گەیاندووە و ڕۆڵیان لە ڕزگارکردن و پاراستنی ناوچەکەدا هەبووە، لەمەودوا بەردەوام دەبن لە جێبەجێکردنی بەرپرسیارێتی مێژوویی خۆیان و بە هەر تێچوویەک بێت ئەوان دژی ئەم هێرشانە دەوەستێتەوە، ئەرکی مێژوویی خۆی لە پاراستنی ناوچەکە و پاراستنی گەلی سووریا جێبەجێ دەکات، نابێت هیچ گومانێک لەم بابەتەدا هەبێت، بەڵام ئەم شەڕە شەڕێکی مێژووییه و پێویسته خەڵکی ناوچەکه بەشێوەیەکی کارا بەشداری بکەن.
هەسەدە دەشڵێت: لەم ڕۆژە مێژووییەدا داواکاریمان لە گەلەکەمان ئەوەیە، کە لەپێناو پاراستنی گوندەکەمان و شارەکەمان و تەواوی ناوچەکە، گەلەکەمان شانبەشان لە بەرەکانی بەرگری لە چوارچێوەی شەڕی گەلی شۆڕشگێڕدا بوەستێت، به تایبەتی داوا له هەموو گەنجانی ناوچەکه دەکەین، لەگەڵ کورد و عەرەبەکان به سریان و ئاشووری و ئەرمەنی و تورکمان بە ئەرکی مێژوویی هەڵبستن و بەشداری ڕیزەکانی (هەسەدە) بکەن، ئەم شەڕە شەڕی هەموو بەها و بنەما مرۆییەکان و ئازادییە، شەڕی ڕووناکی و سەرکەوتنە بەرامبەر تاریکی داعش و عەقڵیەتی ئەردۆغان، ئەم شەڕە شەڕێکی سەرکەوتنی گەورەیە و دەستەبەرکردنی ژیانی هاوبەشی برایەتی و خوشکایەتی گەلانە.
