لیژنەی دارایی ئەنجومەنی نوێنەران پرسی هەناردەکردنەوەی نەوتی هەرێمی کوردستانی لەگەڵ وەزارەتی نەوتی عێراق تاوتوێ کرد و پەرلەمانتارێکی کوردیش دەڵێت، کۆبوونەوەکە ئەرێنی بوو.
ئەمڕۆ یەکشەممە، لیژنەی دارایی ئەنجومەنی نوێنەران میوانداری باسم محەمەد، بریکاری وەزارەتی نەوت و خوزەیر عەباس، بەڕێوەبەری گشتی کۆمپانیای سۆمۆ و ژمارەیەک بەرپرسی دیکەی وەزارەتی نەوتی کرد بۆ تاوتوێکردنی پرسی هەموارکردنی ئەو ماددانەی یاسای بودجەی گشتی عێراق کە پەیوەندییان بە هەناردەکردنی نەوتی هەرێمی کوردستانەوە هەیە.
لە کۆبوونەوەکەدا عەتوان عەتوانی، سەرۆکی لیژنەی دارایی جەختی لە گرنگی کۆبوونەوەکە و قۆستنەوەی کرد بۆ ڕووبەڕووبوونەوەی هەر گۆڕانکارییەکی گریمانەکراو کە لە نرخی نەوتدا ڕوو بدات.
ئاماژەشیدا بە پێویستیی هەموارکردنی ئەو ماددانەی کە پەیوەستن بە گرێبەستی خەرجی بەرهەمهێنانی نەوت و هەناردەکردنی لە یاسای بودجەدا و باسیشی لە جیاوازی سروشت و میکانیزمی دەرهێنانی نەوت لە کێڵگە جیاوازەکانی عێراق کرد و وتیشی: “لیژنەی دارایی ڕاپۆرتی خۆی بۆ ئەنجومەنی نوێنەران بەرزدەکاتەوە”.
لە کۆبوونەوەکەدا پرسی خەرجی بەرهەمهێنانی نەوت، شایستە داراییەکانی کۆمپانیاکان و ئاستی پابەندبوون بە گرێبەستەکان تاوتوێ کران.
لایخۆشیەوە بریکاری وەزارەتی نەوت دۆسیەی هەناردەکردنی نەوتی هەرێمی کوردستانی بۆ لیژنەکە ڕوونکردەوە و جەختی لە گرنگیی ڕێککەوتن لەو بارەیەوە کردەوە.
دوای کۆبوونەوەکەش، غازی دۆسکی، ئەندامی لیژنەی دارایی لە لێدوانێکیدا بۆ ڕۆژنامەنووسان کۆبوونەوەکەی بە ئەرێنی وەسف کرد.
