ئەمریکا ڕەتیدەکاتەوە پەیوەندی بە ئاڵۆزییەکانی ئەمدواییەی سووریاوە هەبێت و جەخت دەکاتەوە لەوەی لە نزیکەوە چاودێری دۆخەکە دەکەن.
شان ساڤیت، وتەبێژی ئەنجوومەنی ئاسایشی نیشتمانی کۆشکی سپی ڕایگەیاند، لە نزیکەوە چاودێری دۆخی سووریا دەکەن و لە ٤٨ کاتژمێری ڕابردوودا بە بەردەوام لەگەڵ پایتەختی وڵاتانی ناوچەکە لە پەیوەندی دابوون.
ساڤیت جەختی کردەوە کە هۆکاری ئەو دۆخە ڕەتکردنەوەی پرۆسەی سیاسی بووە لە لایەن بەشار ئەسەدەوە ئەوەش بە متمانەی ئێران و ڕووسیا.
وتەبێژی ئەنجوومەنی ئاسایشی نیشتمانی کۆشکی سپی ڕایگەیاند، “ئەمریکا هیچ پەیوەندییەکی بەو ئاڵۆزییانە نییە کە لە لایەن دەستەی تەحریر شام کە وەک ڕێکخراوێکی تیرۆریستی دەناسرێت، ئەنجام دەدرێت”.
شان ساڤیت جەختی لەوەش کردووەتەوە کە ئەمریکا لەسەر بنەمای بڕیاری نەتەوە یەکگرتووەکان پابەندە بە هەوڵەکان بۆ کەمکردنەوەی گرژییەکان و نەهێشتنی جەنگی ناوخۆیی لە سووریا و هەروەها ڕایگەیاندووە، هیچ کاتێک ڕێگە نادەن بە زیندووبوونەوەی داعش و ئامادەن بۆ پاراستنی سەربازان و کارمەندانی ئەمریکی و بنکە و بارەگاکانیان.
نزیکەی هەفتەیەکە گروپە چەکدارەکانی سەر بە تورکیا هێرشێکی بەرفراوانیان بۆ سەر ناوچەکانی ژێر دەستی سوپای سووریا و میلیشیاکانی سەر بە ئێران دەستپێکردووە و تا ئێستا هەردوو شاری حەڵەب و ئیدلبیان کۆنترۆڵ کردووە.
