هاتووچۆی سلێمانی ڕایگەیاند 28 کامێرای سیستەمی خاڵ بۆ خاڵ لە ڕێگەی نێوان تاسڵوجە – چەمچەماڵ کەوتنەکار و لە چوارشەممەی داهاتووەوە سەرپێچی تۆماردەکەن.
ئەمڕۆ یەکشەممە، بەڕێوەبەرایەتی هاتووچۆی سلێمانی ڕایگەیاند، کامێراکانی سیستەمی چاودێری خێرایی جێگیر بە سیستەمی خاڵ بۆخاڵی نێوان تاسڵوجە – چەمچەماڵ و بە ووردتر لە سەرەتای پردی تاسڵوجە تا کۆتایی بازگەی (بانی مەقان) لە قۆناغی تاقیکردنەوەدایە و کارەکانی تەواو بووە.
ڕوونیشیکردەوە کە لە کاتژمێر 12ی نیوەڕۆی ڕۆژی چوارشەممەوە (27/11/2024) کامێراکان دەکەونەکار و سەرپێچی تیژڕەوی تۆمار دەکەن.
هاتووچۆی سلێمانی ڕاشیگەیاند، ئەوەی گرنگە شۆفێران بیزانن و بۆئەوەی تووشی ڕووداو و کارەسات و سزای دارایی نەبن، پابەند بن بەو خێراییانەی کە دیاریکراوە لەڕێی هێماکانی هاتووچۆ.
لە ڕاگەیەندراوەکەی هاتووچۆی سلێمانیدا هاتووە: “باس لەوە دەکرێت شۆفێر لە ئاستی کامێراکان بەخێرایی یاسایی بڕوات دواتر خێراییەکەی زیاد بکات تا ئاستی کامێرایەکی تر و دووبارە هێواشی بکاتەوە خێرایی تۆمار ناکات ئەبێت دڵنیابن کە ئەم بۆچوونە هەڵەیە، چونکە سیستەمی خاڵ بۆ خاڵ ( پۆینت تو پۆینت) ئەو ماوەیەی نێوان کامێراکان هەژمار دەکات و سەرجەم کامێراکان بە هەردوو ئاڕاستە لە نێوان تاسڵووجە – چەمچەماڵ و بە پێچەوانەوە بەرەو ئاڕاستەی سلێمانی بەستراونەتەوە بەیەکەوە کە ژمارەیان 28 کامێرایە”.
