دوابەدوای نووسراوەكەی جێگری پارێزگاری سلێمانی بۆ بانكی ناوەندی عێراق بۆ دەستپێكردنی تەوتینی مووچەی فەرمانبەران، پارێزگاری سلێمانی دەڵێت: بابه‌تی ته‌وتین له‌لایه‌ن دادگای فیڕداڵییه‌وه بڕیاری لێدراوه و ده‌بێت سه‌رۆك وه‌زیرانی هه‌ردوولا به‌زوترین كات چاره‌سه‌ری بكه‌ن.
د. هه‌ڤاڵ ئه‌بوبه‌كر، پارێزگاری سلێمانی له‌باره‌ی پڕۆسه‌ی ته‌وتینه‌وه ڕایگه‌یاند، “بابه‌تی ته‌وتین له‌لایه‌ن دادگای فیڕداڵییه‌وه بڕیاری لێدراوه و هه‌ریه‌كه له سه‌رۆك وه‌زیرانی عێراق و سه‌رۆك وه‌زیرانی هه‌رێم بڕیاری لێدراوه و نابێت بكرێت به ململانێی سیاسی و بابه‌تێكی ته‌واو یاسایی و كارگێڕی و داراییه”.
وتیشی، “ده‌بێت سه‌رۆك وه‌زیرانی هه‌ردوولا به‌زوترین كات چاره‌سه‌ری بكه‌ن و مووچه‌خۆران و خه‌ڵك نه‌بن به قوربانی ململانێكان”.
ڕاشیگەیاند، “هه‌موو پڕۆسه‌یه‌كم پێباشه، كه له ڕێگه‌یه‌وه شه‌فافیه‌ت زیادببێت و لێپرسینه‌وه زیادببێت و مووچه سوڕی 30 ڕۆژه‌ی خۆی وه‌ربگرێته‌وه و خه‌ڵك پاره و كاره‌كه‌ی پارێزراو بێت و بتوانێت سوودمه‌ند بێت له‌و ئۆفه‌رانه‌ی بانكه‌كان پێشكه‌شی ده‌كه‌ن، خانه‌نشینان و مووچه‌خۆران مافه‌كانیان پارێزراو بێت”.
جەختیشی كردەوە، خه‌ڵك بتوانێت به كارتێكی ئه‌لیكترۆنی له‌و شوێنه‌ی خواستی مووچه‌كه‌ی وه‌ربگرێت و هیچ كه‌سێك نه‌توانێك لێی ببڕێت و كه‌می بكات و بیكات به مه‌كره‌مه و به خێر.
