سەرۆک وەزیرانی عێراق بۆ بەشداریکردن لە کۆبوونەوەی لووتکەی ھاوبەشی ڕێکخراوی ھاریکاریی ئیسلامی-کۆمکاری عەرەبی گەیشتە ڕیاز و وتەبێژی حکومەتیش هۆشداری دەدات لە تەشەنەکردنی جەنگ لە ناوچەکەدا.
ئەمڕۆ دووشەممە، نووسینگەی ڕاگەیاندنی سەرۆک وەزیرانی عێراق بڵاویکردەوە محەمەد شیاع سوودانی بەسەردانێکی فەرمی گەیشتە ڕیاز و بەشداری لە لوتکەی ھاوبەشی عەرەبی و ئیسلامی تایبەت بە تاوتوێکردنی دەستدرێژییەکانی سەر غەززە و لوبنان دەکات.
لایخۆشیەوە باسم عەوادی، وتەبێژی حکومەتی عێراق کۆبوونەوەکەی ڕیازی بە هەنگاوێکی گرنگ وەسفکرد و ڕایگەیاند، عێراق چاوی لەسەر کۆکردنەوەی پشتوانیی عەرەبییە بۆ دۆزی فەڵەستین و ڕاگرتنی دەستدرێژییەکانی ئیسرائیل بۆ سەر کەرتی غەززە و لوبنان.
وتیشی: “عێراق هەوڵ دەدات کۆبوونەوەکە ببێتە سەکۆیەک بۆ پشتیوانی فەڵەستینی و لوبنانییەکان کە زیاتر لە ساڵێکە ئامێزرەکانی جەنگی ئیسرائیل دەیانکوأێت و ئاوارەیان دەکات”.
عەوادی ڕاشیگەیاند، بەردەوام سەرۆک وەزیرانی عێراق هۆشداری داوە لەوەی ئەو شەڕە ناوچەکە بەرەو جەنگێکی گشتگیر ببات.
