ئەنجوومەنی سەربەخۆی کارەبا پەیامێکیان بڵاوکردەوە و داوای گەڕاندنەوەی سێ مووچەی ساڵی پار دەکەن و دەڵێن” تەوتینی مووچەکانمان دەوێت لە دەرەوەی هەژماری من”.
ئەمڕۆ شەممە 9ـی تشرینی دووەم ئەنجوومەنی سەربەخۆی کارەبا لە کۆنگرەیەکی ڕۆژنامەوانیدا ڕایگەیاند، بەپێی بڕیاری دادگای باڵای فیدڕاڵی کەلەمانگی شوباتدا دەرچووە هەردوو حکومەتی هەرێم و ناوەندی پابەندکردووە بە دابینکردن و پێدانی مووچەی فەرمانبەرانی هەرێم، بەڵام وا هەفتەیەک بەسەر مانگی 11 تێدەپەڕێت و هێشتا مووچەی مانگی 10مان وەرنەگرتووە.
ئاماژە بەوەشدرا، 8 مانگ بەسەر ئەو بڕیارەی دادگا تێپەڕی و هیچ هەوڵێکی جدی نەنراوە و هیچ مانگێک حکومەتی هەرێم لیستی مووچە بە پاکی ڕەوانەی بەغدا ناکات و بەردەوام مووچەکانمان دوادەکەوێت، بۆیە داواکارین تەوتینی مووچەکانمان بکرێت.
لە بەیاننامەکەی ئەنجوومەنی سەربەخۆی کارەبا هاتووە، ئێمە داواکارین تەوتین لەدەرەوەی “هەژماری من” بکرێت و وەک هاوشێوەکانمان لە عێراق ڕێکخستن بۆ دەرماڵەکانمان بکرێت، هاوکات هەرچی زووە دەست بە پلەبەرزکردنەوەمان بکرێت کە ماوەی چەندین ساڵە ڕاگیراوە، تەنها هێزی سەربازی ڕانەگیراوە و بەردەوام پلەبەرزکردنەوەیان هەیە.
هاوکات یەنجوومەنەکە داوای گەڕاندنەوەی مووچە پاشەکەوت و لێبڕاوەکانیان دەکەن، بەتایبەت ئەو سێ مووچەیەی ساڵی پار نەدرا، ئویش لەبەینی بەغدا و هەرێم چارەنووسی بە نادیاری مایەوە.
ئەنجوومەنەکە هۆشداریشیدا، گەر لە ئایندەیەکی نزیکدا وەڵامی خواستەکانیان نەدرێتەوە هەنگاوی تر دەنێین.
