وتەبێژی حکومەتی عێراق ڕایدەگەیەنێت کە سەرکەوتووبوون لە دوورخستنەوەی عێراق لە ئاگری شەڕ و پشتیوانیش بۆ ئێران دووپات دەکاتەوە.
ئەمڕۆ یەکشەممە، باسم عەوادی، وتەبێژی حکومەتی عێراق لە لێدوانێکیدا بۆ ڕۆژنامەی سەباح ڕایگەیاند، عێراق پاڵپشتی کۆماری ئیسلامی ئێران دەکات لە دژی ئەو دەستدرێژییەی کە ئیسرائیل کردییە سەری.
وتیشی، عێراق هۆشداری دەداتە کۆمەڵی نێودەوڵەتی بەرامبەر بەردەوامبوونی دەستدرێژییەکانی ئیسرائیل بۆ سەر وڵاتە عەرەبی و ئیسلامییەکان، داواش لە وڵاتە زلهێزەکان دەکات ڕۆڵی خۆیان بگێڕن بۆ ڕاگرتنی هێرشەکان و ڕێگرتن لەوەی سەرانی ئیسرائیل گەمە بە ئایندەی ناوچەکە و جیهانەوە بکەن.
باسم عەوادی ڕاشیگەیاند، حکومەت سەرکەوتوو بووە لە دوورخستەنوەی عێراق لە ئاگری شەڕ.
لێدوانەکەی وتەبێژی حکومەتی عێراق لە کاتێکدایە هێشتا بە هۆی هێرشی میلیشیا شیعەکانەوە مەترسی هەیە عێراق ڕووبەڕووی گورزی ئیسرائیل ببێتەوە.
