بانكی ناوەندی عیراق زیاتر لە ١٣٤ ملیۆن دۆلاری ئەمریكایی دەخاتە بازاڕەوە كە بە بڕێكی زۆر زیاتر بەراورد بە ڕۆژانی پێشوو دادەنرێت و وەك هەوڵێكیشە بۆ دابەزاندنی نرخی دراوەكە لە بازاڕدا كە بەشێوەیەكی بێ پێشینە بەرزبۆتەوە.
ئەمڕۆ سێ شەممە، بانكی ناوەندی عیراق، بڕی ١٣٤ ملیۆن و ٥٣١ هەزار و ٨٢٨ دۆلاری خستەبازاڕەوە، ئەمەش بە بڕێكی زیاتری فرۆشتنی ئەو دراوە دادەنرێت بەراورد بە ڕۆژانی پێشوو.
بانكی ناوەندی دەڵێت: “لە كۆی گشتی پارەكە ٥٨ ملیۆن و ٣٠٠ هەزار دۆلاری بەشێوەی كاش فرۆشراوە و ئەوی تر كە ٧٦ ملیۆن و ٢٣١ هەزار و ٨٣٨ دۆلار بوو بۆ پتەوكردنی ڕەسیدی بانكەكان بووە لە دەرەوەی وڵات”.
هەر لە بەیاننامەكەی بانكی ناوەندیدا هاتووە، ”لە پرۆسەكەدا ٩ بانك بۆ دابینكردنی داواكاریی پتەوكردنی ڕەسیدی دەرەوە و ١١ بانك بۆ دابینكردنی داواكاریی نەختینە و ٢٣٤ كۆمپانیا بەشدارییان كردووە، هەر دۆلارێكیش بە ١٤٦٠ دینار فرۆشراوە.
ئێوارەی ئەمڕۆ سێ شەممە، نرخی دۆلار لە بازاڕەكانی ناوخۆدا بەشێوەیەكی بەرچاو ڕووی لە دابەزین كرد و نرخی ١٠٠ دۆلار بە ١٥٣ هەزار و ٨٠٠ دینار مامەڵەی پێوەكرا.
