سەرۆکی یەکێتی لە ئەمریکا لەگەڵ کۆنگرێسمان براد شنایدەر، ئەندامی لیژنەی کاروباری دەرەوەی ئەنجوومەنی نوێنەرانی ‘دیموکراتەکان کۆبووەوە و جەختی لە بەڕێوەچوونی هەڵبژاردن لە وادەی خۆیدا کرد.
نووسینگەی ڕۆژنامەوانی سەرۆکی یەکێتی بڵاویکردەوە، لە کۆبوونەوەکەدا دوایین گۆڕانکارییەکانی ناوچەکە گفتوگۆیان لەبارەوەکرا و جەخت لە بەردەوامیی هەوڵە نێودەوڵەتییەکان کرایەوە بۆ پاراستنی ئارامی و ئاسایش لە ناوچەکە.
لە بڵاوکراوەکەدا ئاماژە بەوە کراوە، “بافڵ جەلال تاڵەبانی هەڵوێستی یەکێتی لەبارەی دۆخی هەرێمی کوردستان و عێراق روونکردەوە، و بەردەوامیدان بەگفتوگۆی بەرپرسیارانەی نێوان هێزە سیاسییەکانی هەرێمی کوردستان و عیراق، بە فاکتەری سەرەکیی بەدیهێنانی سەقامگیری و ئاڕاستەکردنی وڵات بەرەو خۆشگوزەرانی ناوبرد. و دەشڵێت” دەبێت هەموولایەک بەرژەوەندییە نیشتمانییەکان پێشبخەن و هەوڵەکان لەخزمەت خەڵکدا بێت.”
بافڵ تاڵەبانی ئاماژەی بەوەشکردووە، هەوڵەکان بۆ جەختکردنەوە لەسەر چاکسازی و یەکخستنی هێزی پێشمەرگە زیاتر دەکەن و وادەکەن هێزی پێشمەرگە لەچوارچێوەی هێزێکی نیشتمانی و نەتەوەییدا ڕۆڵ بگێڕێت، فراوانکردنی هەماهەنگییە سەربازییەکانیش لەنێوان هەرێمی کوردستان، عێراق و هاوپەیمانیی نێودەوڵەتی دەبێتە مایەی سەقامگیریی زیاتری ناوچەکە و دوورخستنەوەی مەترسییەکانی تیرۆر لەسەر ژیانی خەڵک.
هەروەها سەرۆکی یەکێتی جەختی لە پاراستنی مافە دەستوورییەکانی گەلی کورد لە عێراق کردەوە، راشیگەیاند، باشترین بژاردە بۆ گۆڕانکاری لە پرۆسەی حوکمڕانی و هەنگاونان بەرەو هەرێمێکی دیموکراسی و خۆشگوزەرانتر هەڵبژاردنە.
شایەنی باسە ماوەی سێ ڕۆژە بافڵ تاڵەبانی سەرۆکی یەکێتی بە سەردانێکی فەرمی لە ئەمریکایە و بڕیاروایە چەندین دیدار و کۆبوونەوە ئەنجام بدات.
