لە هەولێر نۆ پڕۆژەی تایبەت بە ڕێگاوبان جێبەجێدەکرێت

بەپێی ڕاگەیەندراوێکی پارێزگای هەولێر، دەست بە جێبەجێکردنی نۆ پڕۆژەی چاککردنەوە و قیرتاوکردنی ڕێگاوبان دەکرێت.

پارێزگای هەولێر ڕاگەیەندراوێکی بڵاوکردەوە، لە پێناو خزمەتکردنی زیاتری هاووڵاتییان و ئاسانکاری بۆ شۆفێران و باشترکردنی ڕێگاوبانەکانی سنووری پارێزگای هەولێر، نۆ پڕۆژەی چاککردنەوە و قیرتاوکردن و دروستکردنی ئاوبەر، لە چەندین شوێنی جیاجیا، لەلایەن بەڕێوەبەرایەتی پاراستن و چاککردنەوەی ڕێگاوبانی هەولێر خراوەتە تەندەرەوە و بەم نزیکانە دەست بەجێبەجێکردنیان دەکرێت.

لە ڕاگەیەندراوەکەدا ناوی پڕۆژەکان هاتووە:

1- چاککردنەوە و قیرتاوکردنی رێگای سەرەکی (بنەسڵاوە، پونگینە، گردیش، چەمرگە) بە درێژی 12,5 کیلۆمەتر.

2- چاککردنەوەی خێرا بۆ چەند شوێنێکی جیاجیا لە ڕێگای سەرەکی (شەمامك، شێخ شێروان، عەوێنە) بە درێژی 21,7 کیلۆمەتر.

3- دروست كردنی ئاوبەری سندوقی (3*3) نۆ چاوە لەسەر ڕێگای نێوان گوندەکانی (بن بێرز، عارەب کەند) لە ناحیەی شەمامک.

4- چاککردنەوەی خێرا بۆ چەند شوێنێکی جیاجیا لە ڕێگای سەرەکی (مەخمور، قووشاغلو، قووشتەپە) بە درێژی 19,5 کیلۆمەتر.

5- چاککردنەوەی خێرا بۆ چەند شوێنێکی جیاجیا لە ڕێگای سەرەکی (بەستۆڕە، بەربیان، دارەشەکران، ئیفراز) بە درێژی 32 کیلۆمەتر دەکەوێتە قەزای خەبات.

6- چاککردنەوە و قیڕتاوکردنی رێگای (هەبان، دووڕیانی باسکە کاریتە) بە درێژی 11 کیلۆمەتر.

7- چاککردنەوەی خێرا بۆ چەند شوێنێکی جیاجیا لە ڕێگای سەرەکی (شێخ مەممودیان، لۆفەکانی زینەتیر، سێریانی بالیسان خەلیفان زینەتیر) بە درێژی 13,6 کیلۆمەتر لە ناحیەی بالیسان سەر بە قەزای شەقلاوە.

8- چاککردنەوەو قیرتاوکردنی ڕێگای (کۆڕێ، بیرێژ) بە درێژی 4 کیلۆمەتر لە ناحیەی کۆڕێ قەزای پیرمام.

9- چاککردنەوەی خێرا بۆ چەند شوێنێکی جیاجیا لە ڕێگای سەرەکی (حوجران، دەربەندی گۆمەسپان) بە درێژی 21 کیلۆمەتر.