نرخی دۆلار ڕووی لە هەڵکشان کرد و تمەنیش دابەزی

پاش نیوەڕۆی ئەمڕۆ لە بازاڕەکاندا نرخی 100 دۆلار گەیشتە 148 هەزار و 900 دینار بەمەش دۆلار ڕووی لە بەرزبوونەوە کرد.

ئەمڕۆ سێشەممە 16ی نیسان نرخی 100 دۆلاری ئەمریکی لەکاتی کردنەوەی بازاڕەکانی دراودا بە 148 هەزار و 250 دینار مامەڵەی پێوەکرا، بەڵام پاش نیەوەڕۆ دۆلار ڕووی لە بەرزی کرد.

لە ئێستادا نرخى 100 دۆلار بەرامبەر 148هەزار و 900 دینار مامەڵەى پێوە دەکرێت و بەوەش بەراورد بە بەیانى ئەمڕۆ نرخى هەر 100دۆلارێک بە بڕى 650دینار بەرزبوەوە، هەروەها، 100دۆلارى ئەمریکى بەرامبەر شەش ملیۆن و 520هەزار تمەن ئاڵوگۆڕ دەکرێت.

هەرچەندە پێشبینی دەکرا سەردانەکەی سودانی بۆ ویلایەتە یەکگرتووەکانی ئەمریکا نرخی دۆلار داببەزێنێت، بەڵام هێرشەکانی چەند ڕۆژی ڕابردووی ئێران بۆ سەر ئیسرائیل،  بەهای دۆلاری بەرزکردۆتەوە و بەهای نەوتی دابەزاند، بەتایبەت ئەمڕۆ کە نزیکە لەوەی 100 دۆلار ببێتە 149 هەزار دیناری عێراقی.