سه‌رۆكی لیژنه‌ی كۆگاكانی قائیمقامیه‌تی سلێمانی ئاشكرایكرد، له مانگی ڕابردوودا ده‌ستیان به‌سه‌ر زیاتر له 50 تۆن خوارده‌مه‌نی و كاڵاوشمه‌كی خراپدا گرتووه كه 45 تۆنی قه‌یسی و هه‌ڵوژه‌ی وشك بووه.
جه‌مال محه‌مه‌د، سه‌رۆكی لیژنه‌ی كۆگاكانی قائیمقامیه‌تی سلێمانی ڕایگه‌یاند، له ئه‌نجامی كاروچالاكی مانگی ڕابردووی لیژنه‌كه و به‌سه‌ر كردنه‌وه‌ی سه‌رجه‌م كۆگاكان، ده‌ست به‌سه‌ر زیاتر له 50 تۆن خوارده‌مه‌نی و كاڵاوشمه‌كی خراپ و ماوه‌به‌سه‌رچوودا گیراوه كه خاوه‌ن شوێنه‌كان به نیازبوون له مانگی ڕه‌مه‌زاندا به‌شێوه‌ی هه‌ڵڕژاو و به نرخی كه‌متر له بازاڕه‌كاندا به‌سه‌ر هاووڵاتیاندا ساغیبكه‌نه‌وه.
وتیشی، ئه‌و خۆراك و كاڵاوشمه‌كانه‌ی له مانگی ڕابردوودا له‌لایه‌ن لیژنه‌كه‌وه ده‌ستیان به‌سه‌ردا گیراوه له 45 تۆن قه‌یسی و هه‌ڵوژه، 39 ته‌نه‌كه هه‌نگوین، 120 سێت خواردنه‌وه وزه‌به‌خشته‌كان و به‌بڕی جیاواز شیری منداڵ، رۆنی چێشت، په‌نیر، زه‌یتون له‌گه‌ڵ 242 كارتۆن زاهی، دوو هه‌زار و 880 قتوو مادهی پاككه‌ره‌وه‌ی دیكه و كلینێكسی ته‌ڕ و بڕێكی زۆر مادهی جوانكاری خانمان پێكهاتوون.
ڕونیكرده‌وە، له مانگی ئاداردا لیژنه‌ی كۆگاكانی قائیمقامیه‌تی سلێمانی 111 سه‌ردانیان بۆ كۆگاكان ئه‌نجام داوه و 11 كۆگایان ئاگادار كردووه‌ته‌وه كه پابه‌‌ندی مه‌رج و ڕێنماییه‌كانی كاركردن بن هه‌روه‌ها 29 پسوڵه‌ی سه‌رپێچییان بۆ ئه‌و كۆگایانه كردووه سه‌رپێچیان كردووه و ڕووبه‌ڕووی ڕێكاری یاسایی كراونه‌ته‌وه.
سه‌رۆكی لیژنه‌كه ئاماژه‌ی بۆ ئه‌وه‌شكرد، به فه‌رمانی قائیمقامی سلێمانی و له ناوچه‌ی ده‌ره‌وه‌ی نیشته‌جێبوون له‌لایه‌ن لیژنه‌ی تایبه‌تمه‌نده‌وه سه‌رجه‌م ئه‌و خۆراك و كاڵاوشمه‌كانه‌ی ده‌ستیان به‌سه‌ردا گیراوه له‌ناوبراون و خاوه‌نه‌كانیشیان ڕووبه‌ڕووی ڕێكاری یاساییه‌كان كراونه‌ته‌وه.
