لە رۆژی جیھانی ژناندا مەکتەبی سیاسی یەکێتی پەیامێک بڵاودەکاتەوە و دەڵێت،” پشتیوانی ھەمیشەیی یەکێتیی، لەسەر رێبازی سەرۆک مام جەلال، بۆ خەباتی ژنان نەھێشتنی جیاکاری دووپاتدەکەینەوە”.
دەقی پەیامەکەی مەکتەبی سیاسی یەکێتی بۆ رۆژی جیھانی ژنان .
لە بیرەوەری ھەشتی مارسدا، پیرۆزبایی لە ژنانی کوردستان و تەواوی عێراق و جیھان دەکەین، ئەم یادە دەکەینە دەرفەتی دووپاتکردنەوەی پشتیوانی ھەمیشەیی یەکێتیی نیشتیمانیی کوردستان، لەسەر رێبازی سەرۆک مام جەلال، بۆ خەباتی ژنان و بزووتنەوەی یەکسانی و نەھێشتنی جیاکاری و فراوانکردنی بەشداری ژنانی کوردەواری لە ناوەندەکانی بریار و داڕشتنی سیاسەتدا.
لەم یادەدا سڵاو دەنێرین یۆ رۆحی ئەو ژنە تەوارانەی لەپێناو ئازادی و سەربەخۆیی و وەک یەکی کۆمەڵایەتیدا گیانیان بەخشی، رێز و ئەمەکیش بۆ ژنانی خەباتکاری ئەمرۆ لە رێی بەدیھێنانی ماف و یەکسانیخوازیدا، بەتایبەتیش ھەڤاڵان لە ژنانی تێکۆشەری ریزەکانی یەکێتیی نیشتمانیی کوردستان .
