مەسرور بارزانی، سەرۆکی حکومەتی هەرێمی کوردستان ڕایگەیاند هێرشەکەی سەر هەولێر بێ پاساوە و نابێ بێ وەڵام بمێنێتەوە.
ئەمڕۆ سێشەممە، مەسرور بارزانی سەرۆکی حکومەتی هەرێمی کوردستان کە بەمەبەستی بەشداریکردن لە کۆڕبەندی داخۆس لە سویسرایە، کۆنگرەیەکی ڕۆژنامەوانی ئەنجامدا و تێیدا ئیدانەی هێرشەکەی دوێنێی سەر هەولێری کرد.
مەسرور بارزانی ڕایگەیاند، دوێنێ شەو هێرشێکی “بێ پاساو و نامەردانە و دوژمنکارانە” کراوەتە سەر هەولێر و بە هۆیەوە پێشڕەو دزەیی و کچەکەی شەهید بوون.
وتیشی: هیچ دوژمنایەتییەکمان لەگەڵ دراوسێکانمان و ئێران نییە و نازانین بۆچی ئێران خەڵکی مەدەنی لە هەرێمی کوردستان دەکاتە ئامانج.
سەرۆکی حکومەتی هەرێم ستایشی هەڵوێستەکەی حکومەتی عێراقیشی کرد و وتیشی: “نابێت هێرشەکان بێ وەڵام بمێننەوە”.
داواشی لە کۆمەڵگەی نێودەوڵەتی کرد هاوکار بن بۆ کۆتاییهێنان بەو هێرشانە.
