پەرلەمانتارێکی عێراق جەختی لەوەکردەوە کە ناکۆکییەکانی نێوان بەغدا و هەولێر سەبارەت بە یاسای بودجە سیاسی نییە بەڵکو تەکنیکییە.
ئەمڕۆ هەینی، غەریب ئەحمەد، پەرلەمانتاری عێراق بە “بەغداد ئەلیەوم”ی ڕاگەیاند، “ناکۆکییەکانی نێوان بەغدا و هەولێر سەبارەت بە بودجە سیاسی نییە و بەڵکو تەکنیکییە، پەیوەندییان بە چارەسەرنەکردنی پرسی داهاتە نانەوتییەکانەوە هەیە”.
ئاماژەی بەوەکرد، “رێککەوتنێک بۆ دەنگدان لەسەر هەموارکردنەوەی پشکی هەرێمی کوردستان لە بودجەدا هەیە، پاش یەکلایی کردنەوەی ناکۆکییەکانی نێوان هەولێر و بەغدا سەبارەت بە پرسی داهاتە نانەوتییەکان و داهاتی گومڕکی، ئەوەی دەمێنێتەوە تەنها لێکتێگەیشتنە لەنێوان شاندی هەرێم و بەغدا”.
دووشەممەی ڕابردوو، وەفا محەمەد کەریم، ئەندامی پارتی دیموکراتی کوردستان، باسی لەوەکرد هەموو پێوەرەکان ئەرێنین سەبارەت بە هەموارکردنەوەی پشکی هەرێم لە بودجە، ئەگەر لە کۆتا ساتدا پاشەکشە نەکەن و پابەندی ڕێککەوتنەکان ببن.
ئاماژەی بەوەکرد، “شاندی هەرێم دەستی بە دانوستان کردووە لەگەڵ حکومەتی فیدراڵی بۆ چارەسەرکردنی پشکی هەرێم لە بودجە، لەگەڵ پرسی یاسای نەوت و غاز”.
ئەوەشی خستەڕوو، “ئەنجوومەنی وەزیران ڕەنگە لە دانیشتنی داهاتوویدا ڕەزامەندی لەسەر هەموارکردنەوەی بودجەی هەرێم بدات، ئەگەر ناکۆکییەکان چارەسەرببن، کۆدەنگییەک لەسەر هەموارکردنەوەی بودجە و یەکلاکردنەوەی پشکی هەرێم لەناو پەرلەماندا هەیە”.
حکومەتی هەرێمی کوردستان دەیەوێت مووچەی فەرمانبەرانی هەرێمی کوردستان لە خەرجی ڕاستەقینە جیابکرێتەوە، تاوەکو گرفتی مووچەی مووچەخۆران چارەسەرببن.
