وتەبێژی وەزارەتی دەرەوەی ئەمریکا ڕایگەیاند، ئەنتۆنی بلینکن، وەزیری دەرەوەی ئەمریکا لە ڕێگەی کەناڵە دیپلۆماسییەکانەوە کاردەکات بۆ ڕاگرتنی هێرشەكانی تورکیا لە ڕۆژئاوای كوردستان و ڕێزگرتن لە لێکتێگەیشتن و ڕێککەوتنەکانی ئاگربەست.
وتەبێژی وەزارەتی دەرەوەی ئەمریکا “نۆرس پرێس”ی ڕاگەیاندووە، “واشنتۆن بە قووڵی نیگەرانە لە هێرشە ئاسمانییەکانی ئەم دواییە بۆ سەر ڕۆژئاوای كوردستان، کە بووە هۆی کوژران و برینداربوونی هاووڵاتییانی مەدەنی و هێرشکردنە سەر ژێرخانی مەدەنی، پێویستە دەستبەجێ هێرش و توندوتیژییەكانی تورکیا بۆ سەر ڕۆژئاوای کوردستان ڕابگیرێت”.
ئەوەشی خستەڕوو، ئەنتۆنی بلینکن، وەزیری دەرەوە لە پەیوەندیدایە لەگەڵ هاکان فیدان، وەزیری دەرەوەی توركیا و کەسانی دیکەی ناوچەکە بۆ گفتوگۆکردن لەسەر کۆمەڵێک بابەتی پەیوەست بە ئاسایشی ناوچەکە.
شایەنی باسە هەفتەی ڕابردوو تۆپخانە و فڕۆکەکانی تورکیا دەیان شوێن و دامەزراوە خزمەتگوزاریی و پڕۆژەی دانیشتووانیان بۆردومان کرد، بووە هۆی گیان لە دەستدانی ١٠ کەس و برینداربوونی ٢٥ کەسی دیكە.
