مامۆستایانی وانەبێژ ڕایانگەیاند، هیچ بەرپرسێکی پەروەردەیی و حکومی نابێت وەکو تاک لەگەڵ هیچ کەسێک دابنیشێت و بۆچوونی تاک بکاتە بۆچوونی گشتیی مامۆستایانی وانەبێژ، ده‌ڵێن، “هیچ کەسێک نوێنەری گشتی ئێمە نییە”.
له ڕاگەیەندراوێکدا كه واژۆی نوێنه‌ری مامۆستایانی وانەبێژ له ١٥ ناوچه‌ی هه‌رێمی كوردستانی له‌سه‌ره، تێیدا هاتووه: ” لای هەمووان ڕوونە نوێنەرانی مامۆستایانی وانەبێژ لەسەرجەم شارو شارۆچکەکان بەوپەڕی دڵسۆزییەوە لەکار و ژیانی تایبەتی خۆیان بووراون، خۆیان و کات و لایەنی ماددییان خۆبەخشانە تەرخانکردووە بۆ کاری وانەبێژان، ئەم کارە بەهەوڵ و هەماهانگی و هەموولایەک بەڕێوەچووە و بەڕاوێژ بڕیار لەهەنگاوەکانی داهاتوو دراوە”.
لە ڕاگەیەندراوەکەدا ئاماژە بەوەکراوە، “وەکو نوێنەرانی سەرجەم ئەو شارو شارۆچکه‌كان بۆ ڕای گشتی و تەواوی کەناڵ و بەرپرسانی پەروەردەیی ڕایدەگەیەنین، نوێنەرانی مامۆستایانی وانەبێژ هیچ کەسێک وەکو نوێنەری گشتی مامۆستایانی وانەبێژ تەماشانەکەن و بەتەنیاش هیچ کەسێک ناتوانێت بەدەم کێشەی مامۆستایانی وانەبێژانەوە بچێت، بۆ هیچ کەسێک نییە ناوی وانەبێژان وەکو پاشناوی شەخسیی بۆخۆی بەکار بهێنێت”.
ئەوەشی خستووەتەڕوو، هەموو نوێنەرانی شار و شارۆچکەکان جێگەی ڕێز و تەقدیرن و خزمەتی هیچ کەس نابێت پشتگوێ بخرێت و نابێت هیلاکی هیچ نوێنەرێک بچێتە گیرفانی تاکە کەسێکی ترەوە، ” ئەم بڕیارانەش دوای کۆبوونەوەیەکی سێ کاتژمێریی لە ناوەڕاستی وەرزی یەکەمی بایکۆت بڕیاری لێدراوە و بۆچوونی سەرجەم شارو شارۆچکەکانی سنوری بایکۆتی لەسەرە”.
مامۆستایانی وانه‌بێژ باسیان لەوەکرد، “هیچ بەرپرسێکی پەروەردەیی و حکومی نابێت وەکو تاک لەگەڵ هیچ کەسێک دابنیشێت و بۆچونی تاک بکاتە بۆچونی گشتیی مامۆستایانی وانەبێژ، کە وەک ڕایەڵەیەکی پێکەوە بەسراو نوێنەرەکانیان خەریکی خزمەتن”.
