ڕۆژ بەڕۆژ نرخی دۆلار لە بازاڕەكانی هەرێم و عێراق دێتە خوارەوە و وتەبێژی بازاڕی دۆلارەكەی سلێمانی دەڵێت: “دەبێت بە 145 هەزار دینار” و شارەزایانی دراویش باسی چەند هۆكارێك دەكەن بۆ كۆنتڕۆڵ كردنی نرخی دۆلار.
دوابەدوای ڕێكارەكانی بانكی ناوەندی بۆ كۆنتڕۆڵ كردنی دۆلار و ڕێككەوتنی نوێی وەزارەتی گەنجینەی ئەمریكا و بانكی ناوەندی عێراق بۆ پێدانی دۆلاری زیاتر بە بەغدا لە ساڵی نوێدا، بەهای دۆلار ڕووی لە دابەزینێكی بێ وێنە كردووە و لەماوەی یەك هەفتەدا زیاتر لە 10 هەزار دینار لە بەهاكەی شكاوە.
شارەزایانی بواری دراو ڕایدەگەیەنن، كە لەگڵ هاتنی ساڵێ نوێ و سەركەوتنی ڕێكارەكانی بانكی ناوەندی، بەهای دۆلار زیاتر دادەبەزێت و پێدەچێت نزیك ببێتەوە لە بەهای فەرمی بانكی ناوەندی، كە 100 دۆلاری بە 132 هەزار دینار دیاری كردووە.
جەبار گۆران، وتەبێژی بازاری دۆلارەكەی سلێمانی ڕاگەیاند، “هەنگاوەكانی بانكی ناوەندی و ڕێككەوتنەكانی عێراق لەگەڵ ئەمریكادا جیاوازن لە هەنگاوەكانی پێشتر و لێدوانەكانی ئەلینا رۆمانۆوسكی، باڵیۆزی ئەمەریكا لە عێراق دڵخۆشكەرن”.
ڕاشیگەیاندووە، قەبارەی هاوردەكردنی دۆلار لە دەرەوە بەرەوپێشچونی بەخۆیەوە بینیوە و ئەمەش ئەوە دەردەخات دۆخی دارایی عێراق بۆ ئەمریكا گرنگییەكی زۆری هەیە.
وتەبێژی بازاری دۆلارەكەی سلێمانی پێشبینی دەكات، نرخی دۆلار بەرامبەر بە دیناری عێراقی دابەزینی زیاتر بەخۆوە ببینێت و دەڵێت: “بەهۆی ئەوەی نرخی دۆلار خانەی 50ـی تێپەڕاند دەشگاتە 145 هەزار دینار”.
لە مانگی ڕابردوودا بەهای دۆلاری ئەمریكی بەرامبەر بە دیناری عێراقی بەڕێژەیەكی بەرچاو بەرزبووەوە و گەیشتە نزیكەی 170 هەزار دینار و ئەوەش وای لە بەرپرسانی بانكی ناوەندی عێراقی كرد كۆبوونەوەیەكی بەپەلە ئەنجام بدەن لەگەڵ بەرپرسانی بانكی فیدڕاڵی ئەمریكی و وەزارەتی گەنجینەی ئەو وڵاتە بۆ پێدانی دۆلاری زیاتر بە عێراق و گەیشتیشنە ڕێككەوتن و ڕاستەوخۆش چەند بارێكی دۆلار گەیشتە بەغدا و ئەوەش بووە هۆی كۆنتڕۆڵ كردنی دۆلار و دابەزاندنی نرخەكەی.
بە وتەی پسپۆڕانی دراو، هۆكارێكی دیكەی دابەزاندنی دۆلار ڕێگەدانی بانكی ناوەندییە بە بانكە حكومی و بازرگانییەكان بۆ هێنانی دۆلار لە دەرەوە لەژێر كۆنتڕۆڵی خۆیدا و هەروەها ڕێككەوتن لەگەڵ توركیا و ئیمارات بۆ كاركردن بە یۆرۆ و درهەمی ئیماراتی بۆ كاروباری بازرگانی.
دوێنێ هیشام ڕوکابی، ڕاوێژكاری سەرۆك وەزیرانی عێراق ڕایگەیاندووە، هەنگاوی ئەرێنیمان لەناو کەرتی بانکیدا ناوە و ئێمە پێشتر وتمان، ئەمڕۆش پشتڕاستی دەکەینەوە، شەڕەکەمان بەرامبەر نرخی دۆلار نزیکە لە کۆتایی.
لای خۆشیەوە، ئالینا رۆمانۆسکی، باڵیۆزی ئەمەریکا لە عێراق لە پەیامێکدا لە تۆڕی کۆمەڵایەتی ئێکس نوسیویەتی: ئەمەریکا بەردەوام دەبێت لە دابینکردنی دۆلار بۆ عێراق لەپێناو خزمەتی سەقامگیری ئابوریی لەو وڵاتە.
