بە ڤیدیۆ؛ بە 35 درۆن هێرش كرایە سەر ئیسڕائیل

تادێت جەنگی نێوان فەلەستین و ئیسڕائیل توندتر دەبێت و ژمارەی قوربانیانی هەردوولا لە هەڵكشانە و كەتیبەكانی قەسام-ی حەماس لەڕێگەی 35 درۆنی خۆكوژییەوە هێرشیان كردە سەر ناوچەكانی ئیسڕائیل.

بەپێی هەواڵی دامەزراوە تەندروستییەكانی فەلەستین، لە کەرتی غەززە 313 کەس و لە کەرتی ڕۆژئاواش 7 فەلەستینی بە هۆی هێرشەکانی ئیسرائیلەوە کوژراون. 20 لەو کەسانەی بەهۆی بۆردوومانی ئیسرائیل لە غەززە کوژراون، منداڵن، هەروەها لانیکەم هەزار و 788 کەسی دیکەش برینداربوون کە 121یان منداڵن.

لای خۆشیەوە، نووسینگەی سەرۆک وەزیرانی ئیسڕائیل بڵاویكردەوە، زیاتر لە 100 هاووڵاتی و سەربازی ئیسرائیلی لە کەرتی غەززە بە دیل گیراون یان بێسەروشوێن بوون و 44 سەربازیش كوژاون.

هاوكات، وەزارەتی تەندروستی ئیسڕائیل بڵاویكردۆتەوە، ژمارەی کوژراوانی ئیسرائیل بەهۆی هێرشەکانی حەماسەوە بۆ 600 کەس بەرزبۆتەوە و دوو هەزار و 48 کەسی دیکە برینداربوون کە 330ـیان لە دۆخێکی مەترسیداردان.

بەپێی ئەو تۆمارە ڤیدیۆییانەی بڵاوكراونەتەوە، تەندروستی ئیسڕائیل بەهۆی زۆری ژمارەی كوژراوەكانەوە، بە گەڵابە كوژراوەكان كۆدەكەنەوە و مەڕاسیمی ئاینییان بۆ سازدەكەن پێش بەخاكسپاردنیان.

لە بەرامبەریشدا، کەتائیبی قەسام، باڵی سەربازیی حەماس ڕایگەیاند، ئۆپەراسیۆنی “تۆفانی ئەقسا” بەردەوامە و هێزی کۆماندۆی قەسام ئۆپەراسیۆنێکیان “بەسەرکەوتوویی” بە پێنج بەلەم کردووەتە سەر کەناراوەکانی عەسقەلان و دەستیان بە سەر ژمارەیەک شوێندا گرتووە و لە ئۆپەراسیۆنەکەدا ژمارەیەک سەربازی ئیسرائیلییان کوشتووە.

ئاشكراشی كردووە، لە ڕێگەی 35 درۆنی خۆكوژییەوە، كە لەلایەن هێزەكانیانەوە دروست كراون، هێرشیان كردۆتە سەر بنكە و بارەگاكانی سوپای ئیسڕائیل.

بۆ بینینی ڤیدیۆكە كلیك لێرە بكە

بۆ بینینی ڤیدیۆكە كلیك لێرە بكە

پەیوەنیدر