هاوکاری دارایی بەسەر خوێندکاراندا دابەش دەکرێت

وەزارەتی پەروەردەی عێراق ڕایگەیاند، لەم مانگەوە هاوکاریی دارایی بەسەر ئەو خوێندکارانەدا دابەش دەکرێت کە کەمدەرامەتن و پێدانی هاوکارییەکانیش تا کۆتایی ساڵ بەردەوام دەبێت.

ئەمڕۆ پێنچشەممە، کەریم سەید وتەبێژی وەزارەتی پەروەردەی عێراق ڕایگەیاند، لەم مانگەوە دابەشکردنی هاوکاری دارایی بەسەر خوێندکارانی کەمدەرامەت لە خوێندنگەکاندا دەستپێدەکات و تا کۆتایی ساڵی خوێندن بەردەوام دەبێت و مانگانە هەر خوێندکارێک بڕی ٣٠ هەزار دیناری پێ دەدرێت.

ئاماژەی بەوەشکرد، لە مانگی یەکەمی ساڵی نوێی خوێندنەوە دابەشکردنی ئەو هاوکارییە دەستپێدەکات و تا کۆتایی ساڵی خوێندن دەخایەنێت و بڕە پارەکە بەشێوەی ماستەرکارت بەسەر خوێندنکاراندا دابەشدەکرێت.

ئەوەشی خستەڕوو، نووسراویان ئاڕاستەی بەڕێوەبەری قوتابخانەکان کردووە بۆ ئەوەی داتا و زانیاری ئەو خوێندکارانەیان بۆ بنێرن کە هاوکارییەکە دەیانگرێتەوە.

پێشتر وەزارەتی پەروەردەی عێراق بڕیاریدابوو، ئەو خوێندکارانەی خێزانەکانیان مووچەی بیمەی کۆمەڵایەتییان هەیە و وەک کەمدەرامەت دەستنیشانکراون، مانگانە بڕی ٣٠ هەزار دیناریان پێدەدرێت، بە مەبەستی هاوکاریکردنیان لە بەردەوامبوون و دوانەکەوتن لە پرۆسەی خوێندن.

پەیوەنیدر