وەزیری پەروەردەی حكومەتی هەرێمی كوردستان ڕەزامەندی نیشاندا بە دامەزراندنی دەرچووانی كۆلێژەكانی (زانست و زمان و ئاداب) وەك وانەبێژ لە كەرتی پەروەردە.
زانکۆی سەڵاحەدین ـ هەولێر لە ڕاگەیەنراوێكدا ئاماژەی بەوەكردووە، وەزیری پەروەردەی حکومەتی هەرێمی کوردستان و سەرۆکی زانکۆی سەڵاحەدین و ڕاگرانی کۆلێژی زمان و کۆلێژی ئاداب كۆبوونەوە.
ئاماژەی بەوەشكردووە، سەرۆکی زانکۆی سەڵاحەدین داوای لە وەزیری پەروەردە کردووە، کە جیاوازی نەکرێت لەنێوان دەرچووانی کۆلێژەکانی ئاداب و زانست و زمان بۆ مەبەستی دامەزراندنیان وەکو وانەبێژ لەسنووری وەزارەتی پەروەردە.”
ئاشكراشی كردووە، باس لەهەماهەنگی لەگەڵ زانکۆی سەڵاحەدین کرا، کە لەداهاتوو خولی شیاندن بۆ دەرچووانی ئەو کۆلێژانەی، کە ئاماژەیان پێکراوە دەکرێتەوە و لەکۆتاییدا وەزیری پەروەردە ڕەزامەندی لەسەر داواکارییەکانی سەرۆکی زانکۆی سەڵاحەدین دەربڕی.
