بەڕێوەبەرایەتی چاودێری بازرگانی سلێمانی ڕادەگەیەنێت، كار لەسەر هەموو ئەو سێكتەرانە دەكەین، كە لەماوەی ڕابردوودا نرخەكەیان بەرزبۆتەوە و لە ئێستادا نان و سەموون وەك هەنگاوی یەكەم كاری لەسەر دەكرێت.
سۆران غەفور، بەڕێوەبەری چاودێری بازرگانی سلێمانی بە (خەڵك)ی ڕایگەیاند، بەردەوامین لەسەر بەدواداچوون و چاودێری كردنی نرخی بازاڕ و هەنگاو بە هەنگاو كار لەسەر ئەو سێكتەرانە دەكەین، كە لەماوەی ڕابردوودا نرخەكەیان بەرزبووەوە.
وتیشی، “لە ئێستادا بەهۆی گرنگییەوە، كار لەسەر نان و سەموون دەكەین و هەنگاوی باشی بڕیوە لە ئێستادا (8 یان 6) نان و سەمووم بە هەزار دینارە بە پێی كێشی گونكەكەی و بەردەوامیش كاری لەسەر دەكرێت”.
ڕاشیگەیاند، هەنگاوی داهاتوو كار لەسەر هەرزانكردنی نرخی كرێی پاسی گواستنەوەی هاووڵاتیان دەكەین، لەگەڵ ئەو سێكتەرانەی دیكە، كە نرخەكەیان بەرزبووبووەوە.
لە ماوەی ڕابردوودا بەهۆی بەرزبوونەوەی بەهای دۆلار و گران بوونی نرخی بەنزین و گاز و غازی شل، نرخی بەشێكی زۆر لە خۆراك و پێویستییەكان و كرێی گواستنەوە بەرزبوونەوە، بەڵام ماوەی مانگێكە نرخی دۆلار دابەزیوەتەوە، بەڵام هێشتا نرخەكان بۆ نرخی جاران دانەبەزێنراونەتەوە.
