ڕۆژ بەڕۆژ ناكۆكییەكانی نێوان یەكێتی و پارتی و تیمە وزارییەكانیان لە حكومەتی هەرێم قوڵ دەبێتەوە و لە ئێستاشدا كێشەی نەبوونی مووچە و ڕاگرتنی هەناردەی نەوت كێشەكانی قووڵتر كردۆتەوە و میدیا عێراقی و جیهانییەكانیش گرنگییەكی زیاتر بە دۆخی سیاسی هەرێم دەدەن و زەنگی “لێكترازان” لە هەرێم لێدەدەن.
ڕۆژنامەی (مۆدێرن دیپلۆماسی)، ڕاپۆرتێكی لەسەر دۆخی هەرێمی كوردستان بڵاوكردۆتەوە و لە بەشی یەكەمیدا باسی (سەرهەڵدان و داکشانی دەسەڵاتی کورد لە عێراق) دەكات و وردەكاری كێشە كەڵەكەبووەكانی دۆخی هەرێم گەنگەشە دەكات و لە بەشی دووەمدا باسی جیابوونەوەی سلێمانی دەكات لە هەرێمی كوردستان.
ڕۆژنامەكە لە ڕاپۆرتەكەدا باسی هەوڵەكانی جیاكردنەوەی پارێزگای سلێمانی لە هەرێمی كوردستانی عێراق دەكات و پێشبینی لێكترازانی هەرێمی كوردستانی كردووە ئەویش بە هۆی ئەو ناكۆكییە گەورەیەی لەنێوان یەكێتی و پارتی هەن.
وەك ڕۆژنامەكە ئاماژەی پێ كردووە، بەشێك لە سەركردەكانی یەكێتی سەرقاڵی تاوتوێكردنی ئەگەری بەكارهێنانی (مافێكی دەستوورین) بۆ ڕاگەیاندنی جیاكردنەوەی پارێزگای سلێمانی لە هەرێمی كوردستانی عێراق و دەڵێت: “دەستووری عێراق بە كۆمەڵێك مەرج كە لە ماددەی 119ـدا ڕوون كراونەتەوە؛ ڕێ بە پارێزگا یان چەند پارێزگایەك دەدات لە چوارچێوەی یەك هەرێمدا خۆیان ڕێك بخەن”.
