بەڕێوەبەرایەتی گەشتوگوزاری سلێمانی ڕایدەگەیەنێت،داهاتی ڕۆژانی جەژن بۆ خاوەن ڕێستۆرانت و چێشخانەكان و مۆڵەكان زیاتر لە حەوت ملیۆن دۆلار بووە، دەشڵێت،” 75 هەزار گەشتیار هاتوونەتە سلێمانی و هەر گەشتیارێك بەگشتی 100 دۆلاری خەرجكردوە”.
ئارام شوانی، بەڕێوەبەری ڕاگەیاندنی گەشتوگوزاری سلێمانی بە (خەڵك) ی ڕاگەیاند، لەڕۆژانی جەژن ڕەمەزانی پیرۆزدا 75 هەزار گەشتیار سەردانی ناوچە گەشتیارییەكانی سلێمانییان كردووە و چاوەڕوانیش دەكرێت تا كۆتایی ئەم هەفتەیە بگاتە 100 هەزار گەشتیار.
ڕاشیگەیاند، خاوەن ڕێستۆرانت و چێشخانەكان و مۆڵەكان و دوكاندارەكان سودمەندی سەرەكی بوون لەو داهاتە و توانیویانە داهاتێكی باشیان دەست بكەوێت .
ئاشكراشیكردووە، كە بەگشتی داهاتی گەشتیاری لەم جەژنەدا حەوت ملیۆن و 500 هەزار دۆلار بووە و هەر گەشتیارێك بەگشتی 100 دۆلاری خەرجكردووە، كە 90%ی ئەو گەشتیارانەی هاتوونەتە سلێمانی خەڵكی ناوەڕاست و باشووری عێراق بوون.
ئەوەشی وتووە، “چاوەڕوان دەكرێت تا كۆتایی ئەم هەفتەیە ژمارەی گەشتیاران بگاتە 100 هەزار و بەوپێیەش داهاتەكەی دەگاتە 10 ملیۆن دۆلار”.
