یەكێتی تۆپی پێی ئیسپانیا، گۆڕانكاریی لە كاتی یاریييەكەی بەرشەلۆنە و ڕیاڵ مەدریددا دەكات كە لە چوارچێوەی یاریی گەڕانەوەی نیوەی كۆتایی جامی پادشای ئیسپانیا بەڕێوەدەچێت.
بەپێی بەیاننامەیەك كە لەلایەن یەكێتی تۆپی پێی ئیسپانیاوە بڵاوكرایەوە”كاتی یارییەكە بۆ ماوەی كاتژمێرێك پێشخرا و لە ڕۆژی 5ی نیسانی داهاتوو لە كاتژمێر نۆی ئێوارە بە كاتی ئیسپانیا، بەڕێوەدەچێت”.
بە هەمان شێوە یاریی ئەتلەتیك بیلباو و ئۆساسۆنا لە گەڕانەوەی نیوەی كۆتایی جامەكە، بۆ ماوەی كاتژمێرێك پێشخرا و لە 4ی نیسانی داهاتوو لە كاتژمێر نۆی ئێوارە بە كاتی ئیسپانیا بەڕێوەدەچێت.
بەرشەلۆنە لە یاریی ڕۆیشتن لە یاریگای سانتیاگۆ برنابیۆ، بە گۆڵێكی بێ بەرامبەر بردنەوەی بەدەستهێنا و گۆڵەكەش لەلایەن میلیتاو بە هەڵە تۆماركرا.
بەرشەلۆنە بەدرێژایی مێژوو زۆرترین ناسناوی جامی پادشای ئیسپانیای بەدەستهێناوە و 31 ناسناوی دەستەبەركردووە، پاشان ئەتلەتیك بیلباو بە 23 ناسناو، ڕیاڵ مەدریدیش 19 ناسناوی بردۆتەوە.
