سەرۆكی هەرێمی كوردستان ڕایگەیاند، ئەنجامنەدانی هەڵبژاردن “شەرعییەتی هەرێمی كوردستان دەخاتە ژێر پرسیارەوە”، بۆیە ئەو وەكو سەرۆكی هەرێمی كوردستان و بەپێی دەستوور دەبێت ڕۆژێك بۆ هەڵبژاردن دیاری بكات.
نێچیرڤان بارزانی، سەرۆكی هەرێمی كوردستان ڕایدەگەیێنێت، لە پەراوێزی كۆنفرانسی ئاسایشی میونشن چەندین كۆبوونەوەی گرنگیان هەبووە. دەشڵێت، تەوەری سەرەكیی كۆبوونەوەكانیان لەگەڵ سەرۆك و سەركردە و بەرپرسانی وڵاتان باسی پەیوەندییەكانی نێوان هەولێر و بە‌غدا بووە و كۆمەڵگەی نێودەوڵەتی بە پەرۆشە بۆ چارەسەركردنی ئەو كێشانە.
لەبارەی هەڵبژاردنی هەرێمی كوردسانیش سەرۆكی هەرێم وتی، دوای گەڕانەوەیان لە میونشن دەست بە گەڕێكی دیكەی كۆبوونەوە لەگەڵ لایەنە سیاسییەكان دەكەن و بابەتی سەرەكیی كۆبوونەوەكانیشیان هەڵبژاردن دەبێت.
ئاماژەی بە ئەوەش كرد، ئەنجامنەدانی هەڵبژاردن “شەرعییەتی هەرێمی كوردستان دەخاتە ژێر پرسیارەوە”، بۆیە ئەو وەكو سەرۆكی هەرێمی كوردستان و بەپێی دەستوور دەبێت رۆژێك بۆ هەڵبژاردن دیاری بكات.
لەبارەی كێشەكانی نێوان پارتی و یەكێتی، نێچیرڤان بارزانی رایگەیاند، كێشە هەیە لەنێوانیان، بەڵام هەموو ئەو كێشانە لەو ئاستەدا نییە كە نیگەرانییەكی گەورەی هەبێت و دەڵێت، من نامەوێ كەمی بكەمەوە لەوەی كە كێشە نییە، “من نامەوێ ئەوە بە كەم ببینم و كە هەموو شتەكان رێك و پێكن، وانییە، چونكە كێشە هەیە، بەڵام پرسیارەكە ئەوەیە ئایا گەیشتووینەتە ئاستێك كە هەڕەشەیەكی زۆر گەورە هەبێت لەسەر هەرێمی كوردستان، من پێموایە نا.”
