سەرچاوەیەكی ئەمنی، ئاكامێكی نوێی قوربانیانی سوپای عیراق و كوژراوانی ڕێكخراوی تیرۆریستی داعش لە پێكداهەڵپژانەكانی قەزای تارمیەی باكووری بەغدا، ئاشكرا دەكات.
نیوەڕۆی ئەمڕۆ پێنج شەممە، سەرچاوەیەكی ئەمنی بە میدیا عیراقییەكانی ڕاگەیاند:”لە پێكداهەڵپژانەكەدا 4 سەربازی سوپای عیراق شەهیدبوون كە (موقەدەم ڕوكن عەممار نوعمان) فەرماندەی فەوجی سێی مغاویر لەنێوانیاندایە، لەگەڵ 6 برینداری تر، 4 چەكداری ڕێكخراوی داعش كوژراون”.
بە وتەی سەرچاوەكە”پێكداهەڵپژانی نێوان هێزە ئەمنییەكان و چەكدارانی ڕێكخراوی تیرۆریستی داعش، تائێستاش (كاتی ئامادەكردنی ئەم هەواڵە) لە تارمیە بەردەوامن”.
پێشتر فەرماندەیی ئۆپەراسیۆنەكانی بەغدا ڕایگەیاندبوو، لە قەزای تارمیە و لە ئۆپەراسیۆنێكی دەستپێشخەریدا بۆ پارێزگاریی لە زیارەتی ڕەجەبی، هێرشكراوەتە سەر حەشارگەیەكی ڕێكخراوی تیرۆریستی داعش و لە ئەنجامدا سێ تیرۆریست كوژران كە یەكێكیان پشتێنی بۆمبڕێژكراوی بەستبوو.
